ՆՈՐ ՈՐՈՇՈՒՄ` ՏԵՂԱՀԱՆՎԱԾՆԵՐԻ ԲՆԱԿՎԱՐՁԵՐԻ ՎԵՐԱԲԵՐՅԱԼ
Գայանե ԳԵՎՈՐԳՅԱՆ
Պատերազմի հետևանքով անօթևան մնացած մեր հայրենակիցներն այսօր ցավալիորեն բազմաթիվ խնդիրների առաջ են կանգնած, որոնցից, երևի, ամենաառօրեականը բնակվարձն է:
Պատերազմից հետո հանրային մշտաքննարկման թեմա է դա, քանի որ որոշ տանտերեր արհեստականորեն բարձրացնում են բնակվարձը, ինչը, բնականաբար, առանց այն էլ դժվարությունների առաջ հայտնված մեր հայրենակիցների համար բեռ է: Եթե համեմատելու լինենք պատերազմից առաջ եղածի հետ, ապա, կարելի է ասել, երկակի, եռակի են հիմա բարձրացել բնակվարձերը, ինչը կապված է մեծ պահանջարկի հետ:
ԱՀ Կառավարությունն իրականացնում է սուբսիդավորում` մարտի 4-ին ընդունված (N 193) որոշման հիման վրա: Որոշման համաձայն` Ստեփանակերտում 1-սենյականոց բնակարանի համար տրամադրվում է 40 հազար դրամ, 2-սենյականոցի համար` 50 հազար, 3-սենյականոցի համար` 60 հազար դրամ, 4-սենյականոցի համար` 70 հազար, 5 և ավելի սենյակների համար` 80 հազարի չափով: Շրջաններում 1 սենյակի համար` 30 հազար, 2 սենյակի համար` 40, 3 սենյակի համար` 50, 4 սենյակի համար` 60, 5 և ավելի սենյակների համար` 70 հազար դրամ:
ԱՀ Տարածքային կառավարման և ենթակառուցվածքների նախարարության Քաղաքացիական պաշտպանության և զորահավաքային նախապատրաստման բաժնի պետ Հայկ Հակոբյանը, ում ղեկավարած բաժինը պատերազմից հետո հիմնականում այս հարցերով է զբաղվում, ներկայացնում է մանրամասներ բնակվարձի սուբսիդավորման, առկա խնդիրների վերաբերյալ. ՙՍկզբնական փուլում քաղաքացիների հետ բավականին արդյունավետ աշխատում էինք, առանց խոչընդոտների պայմանագրերը կնքվում էին, համարյա շուկայական արժեքներով էինք իրականացնում վարձակալությունը: Հետո, սակայն, որոշ խնդիրներ առաջացան. տանտերերից որոշները պայմանագրերը խզում են` տարբեր պատճառաբանություններ առաջ բերելով, որից հետո նորից պայմանագիր կնքելու հայտ են ներկայացնում, իհարկե, բացի որոշման համաձայն տրվող գումարից, տեղահանված մեր հայրենակիցներից պահանջելով լրացուցիչ` ավելի մեծ գումար՚: Այն հարցին, թե հնարավո՞ր է վերահսկողություն իրականացնել, որոշ մեխանիզմներ կիրառել` խնդիրն օրենքի դաշտ բերելու համար, բաժնի պատասխանատուն պարզաբանում է. ՙԿա Արցախի Հանրապետության կառավարության նոր որոշում, ըստ որի` վարձավճարը տրամադրվելու է ավելի բարձր շուկայական գնով, 1 քառ. մետրի արժեքը լինելու է 1200 դրամ: Իրականացվելու է գնահատում, այնուհետև վերահսկողություն է լինելու, որպեսզի բացի ըստ պայմանագրի տրամադրվող գումարի չափից, տանտերը իրավունք չունենա լրացուցիչ գումար վերցնել: Որոշումը խախտող անձինք կենթարկվեն կարգապահական տույժի: Արվելու է հնարավոր ամեն ինչ, որ տանտերը և տեղահանված ընտանիքը վարձավճարի առումով առնչություն չունենան: Տանտերը պայմանագիր է կնքում կառավարության հետ, կառավարությունը` տեղահանված ընտանիքի հետ: Այդ ամենը կիրականացվի որոշումը հաստատվելուց անմիջապես հետո՚:
Պատերազմից հետո, թվում է, ավելի սրտացավ ու կարեկից վերաբերմունք պիտի ունենանք մեկս մյուսի հանդեպ, բայց կա հոգեբանական խնդիր` օգտագործել ամեն տեսակի ՙսողանցք՚ սեփական գրպանը լցնելու համար: Իհարկե, վատ դեպքերը շատ ավելի ճչան են լինում, բայց, ինչպես զրուցակիցս է ավելացնում, կան նաև շատ օրինակելի դեպքեր, երբ տանտերը ոչ թե բարձրացնում է վարձավճարը, այլ, ընդհակառակը` տեղահանված ընտանիքին օգնելու համար նույնիսկ վարձը նվազեցնում է:
Օրենքը` օրենք, բայց մի՞թե այս իրավիճակում չարժե մարդկային բարեխիղճ որակներով առաջնորդվել, զգալ դիմացինի ցավն ու օգնության ձեռք մեկնել: