ԿԵՆՑԱՂԱՅԻՆ ՏԵԽՆԻԿԱ՝ ՏԵՂԱՀԱՆՎԱԾ ԸՆՏԱՆԻՔՆԵՐԻՆ
Լուսինե ՇԱԴՅԱՆ
ԱՀ աշխատանքի, սոցիալական և միգրացիայի հարցերի նախարարության և ՌԴ Կրասնոդարի երկրամասի հայկական համայնքի համագործակցությամբ՝ Արցախում ավելի քան 200 տեղահանված ընտանիքի լվացքի մեքենաներ են տրամադրվել։
-Արցախցիները պետք է զգան, որ Սփյուռքը նրանց կողքին է։ Մեր համայնքի կողմից իրականացվող բարեգործական ծրագրերը միանշանակ շարունակական կլինեն,- ՙԱզատ Արցախ՚-ի թղթակցի հետ զրույցում ասաց Կրասնոդարի հայկական համայնքի փոխնախագահ Հայկ Մուրադյանը՝ նշելով, որ ավելի քան 50 լվացքի մեքենա տրամադրվել է նաև Հայաստանի Հանրապետության մի շարք քաղաքներում /Իջևան, Ստեփանավան, Աբովյան, Սիսիան, Գորիս/ ժամանակավորապես բնակվող տեղահանված ընտանիքներին։
Կրասնոդարի հայկական համայնքի ներկայացուցիչ Համլետ Վաչենանցը մեզ հետ զրույցում ասաց, որ համայնքի ընդհանուր ժողովում կենցաղային պարագաների աջակցության շրջանակներում առաջնահերթությունը տրվել է լվացքի մեքենային։
Հոգսաշատ տանտիրուհիներին տրամադրվող օգնությունը փրկություն է Մարտակերտում ապաստանած հադրութցի երիտասարդ, բազմազավակ մայրիկի՝ Էլինայի համար.
-Գոհ ու շնորհակալ ենք ուշադրության, նրբանկատ աջակցության համար։ Լվացքի մեքենան մեր ընտանիքի համար, իսկապես, անհրաժեշտ և կենցաղային բեռը թեթևացնող անփոխարինելի տեխնիկա է։
Աջակցությունը տրամադրվել է ԱՀ աշխատանքի, սոցիալական և միգրացիայի հարցերի նախարարության պահեստներում, հոկտեմբերի 29-ին։