ԱՐՑԱԽՈՒՄ ԶԲԱՂՎԱԾՈՒԹՅԱՆ ԱՊԱՀՈՎՄԱՆ ՄԻ ՇԱՐՔ ԾՐԱԳՐԵՐ ԵՆ ԳՈՐԾՈՒՄ
Մեզ հետ զրույցում Արցախի Հանրապետության սոցիալական զարգացման և միգրացիայի նախարարության աշխատանքի և զբաղվածության բաժնի պետ Համլետ Պետրոսյանը տեղեկացրել է, որ Հանրապետությունում զբաղվածության ապահովման համար ամենամյա մի շարք պետական ծրագրեր են գործում։
Մասնավորապես՝ աշխատաշուկայում անմրցունակ անձանց աշխատանքի տեղավորման ծրագրով «Միասնական սոցիալական ծառայություն» գործակալության միջնորդությամբ աշխատանքի տեղավորված յուրաքանչյուր անմրցունակ անձի համար՝ վեց ամիս ժամկետով, գործատուին ամսական տրվում է փոխհատուցում՝ տվյալ անձի համար սահմանված ամսական աշխատավարձի 50 տոկոսի չափով, բայց ոչ ավելի, քան նվազագույն ամսական աշխատավարձի չափը։
Բացի այդ, աշխատանքի տեղավորված և ուղեկցողի կարիք ունեցող անձանց ուղեկցողներին ամսական տրվում է աշխատավարձի փոխհատուցում՝ վեցամսյա ժամկետով և օրենքով սահմանված նվազագույն ամսական աշխատավարձի 50 տոկոսի չափով։
Ծրագրի նպատակը՝ աշխատաշուկայում անմրցունակ անձանց աշխատանքի տեղավորելուն նպաստելն է և այդ ճանապարհով կայուն զբաղվածության ապահովումը։
Մյուս ծրագիրը միտված է գործազուրկների և աշխատանքից ազատման ռիսկ ունեցող, աշխատանք փնտրող անձանց մասնագիտական ուսուցման կազմակերպմանը։
«Նպատակն աշխատաշուկայի պահանջներին համապատասխան նոր կարողություններ և հմտություններ ձեռք բերելու միջոցով հարմար աշխատանքի տեղավորման, աշխատանքից ազատման ռիսկի նվազեցման, ինչպես նաև ձեռնարկատիրական գործունեությամբ զբաղվելու հարցերում աջակցելն է։ Մասնագիտական ուսուցման դասընթացների տևողությունը չի կարող գերազանցել երեք ամիսը, իսկ նախնական մասնագիտական պատրաստման և արհեստագործական ուսուցման դեպքում՝ վեց»,-պարզաբանեց ոլորտի պատասխանատուն՝ ավելացնելով, որ դասընթացներում ընդգրկված գործազուրկներին ուսուցման ամբողջ ժամանակահատվածում տրվում է կրթաթոշակ՝ նվազագույն ամսական աշխատավարձի 50 տոկոսի չափով։
Իր բնակավայրից դուրս գտնվող այլ համայնք մասնագիտական ուսուցման ուղեգրվելու դեպքում փոխհատուցվում են նաև ծրագրի շահառուի տրանսպորտային ծախսերը։
Աջակցության մեկ այլ ծրագրով էլ առաջին անգամ աշխատաշուկա մտնող գործազուրկներին հնարավորություն է ընձեռվում ձեռք բերել իրենց մասնագիտական որակավորմանը համապատասխան աշխատանքային փորձ՝ աշխատաշուկայում առավել մրցունակ դառնալու և հարմար աշխատանքի տեղավորելու համար։
Ծրագրի ամբողջ ընթացքում գործազուրկին վճարվում է աշխատավարձ ՝ «Նվազագույն աշխատավարձի մասին» օրենքի 1-ին հոդվածով սահմանված չափով, գործատուի մոտ աշխատանքային փորձի ձեռքբերման գործընթացը կազմակերպող մասնագետին՝ նրա նախորդ տարվա միջին ամսական աշխատավարձի 20 տոկոսի չափով հավելում, բայց ոչ ավելի, քան նվազագույն ամսական աշխատավարձի չափը։ Գործատուին էլ գումար է տրամադրվում գործազուրկի աշխատավարձից հաշվարկվող եկամտային հարկը և օրենքով սահմանված դեպքում՝ նաև պարտադիր դրոշմանիշային ու սոցիալական վճարները փոխհատուցելու համար։
Պետությունը գործատուին միանվագ փոխհատուցում է տրամադրում նաև աշխատաշուկայում անմրցունակ անձանց աշխատանքի տեղավորման ծրագրով։ Հ. Պետրոսյանի տեղեկատվությամբ՝ այն բաղկացած է երկու ենթածրագրից։
Առաջինով՝ աշխատաշուկայում անմրցունակ անձանց աշխատանքային ունակությունների և կարողությունների ձեռքբերման համար իրականացվում է միանվագ փոխհատուցում գործատուին՝ 200 հազար դրամ։ Երկրորդ ենթածրագրի համաձայն՝ հաշմանդամություն ունեցող գործազուրկների աշխատատեղի հարմարեցման համար իրականացվում է միանվագ փոխհատուցում գործատուին՝ մինչև 500.000 դրամ։ Մեր զրուցակցի հաղորդմամբ՝ շարունակվում է վարձատրվող հասարակական աշխատանքների կազմակերպման միջոցով գործազուրկների ժամանակավոր զբաղվածության ապահովման ծրագիրը։
Վարձատրվող հասարակական աշխատանքի ծրագրի իրականացման առավելագույն ժամկետը երեք ամիս է։ Այդ շրջանակներում կատարված աշխատանքների կամ մատուցված ծառայությունների դիմաց մեկ աշխատանքային օրվա համար առավելագույնը վճարվում է 6 հազար 330 դրամ՝ ներառյալ եկամտային հարկը և օրենքով սահմանված դեպքում՝ սոցիալական վճարը։ Ծրագրի արժեքը չի կարող գերազանցել 20 մլն. դրամը։
ԱՀ սոցիալական զարգացման և միգրացիայի նախարարության կողմից կազմակերպվող աշխատանքի տոնավաճառները Հանրապետությունում զբաղվածության ապահովման ծրագրերի բաղկացուցիչն են։
Ըստ Հ. Պետրոսյանի՝ օգոստոսի 6-ին Ստեփանակերտում կազմակերպված աշխատանքի տոնավաճառին մասնակցել է 61 գործատու՝ 14 տարբեր ոլորտներից՝ ներկայացնելով ավելի քան 1500 թափուր աշխատատեղ։
«Աշխատանք փնտրողները հիմնականում մեզ դիմում են բարձր աշխատավարձով ու, այսպես կոչված, հանգիստ աշխատանքի ակնկալիքով։ Կան բարձր որակավորում պահանջող մասնագիտություններով աշխատատեղեր, որ տարիներով չեն համալրվում»,- ասաց գերատեսչության աշխատանքի և զբաղվածության բաժնի պետը։ Նրա տեղեկացմամբ՝ ամսվա կտրվածքով նախարարությանը դիմած աշխատանք փնտրողներից մոտ 10-15-ն իրենց ուղղորդմամբ ապահովվում է աշխատանքով։
Աննա ԱԼԵՔՍԱՆՅԱՆ