ՈՌՈԳՄԱՆ ՑԱՆՑԻ ԸՆԴԼԱՅՆՄԱՆ ՈՒՂՂՈՒԹՅԱՄԲ ՄԵԾԱԾԱՎԱԼ ԱՇԽԱՏԱՆՔՆԵՐ ԵՆ ԻՐԱԿԱՆԱՑՎՈՒՄ
Արցախի ջրային կոմիտեի նպատակն է նաև՝ առաջին հերթին նպաստել գյուղատնտեսության ոլորտում զբաղվածության ապահովմանը և ներդրումների ավելացմանը։ Այս մասին մեզ հետ զրույցում ասաց ԱՀ ջրային կոմիտեի նախագահի առաջին տեղակալ Արարատ Խաչատրյանը՝ հավելելով, որ ոռոգման համակարգերի ներդրմամբ և ընդլայնմամբ նպաստում են ինչպես գյուղատնտեսության զարգացմանը, այնպես էլ նոր աշխատատեղերի ստեղծմանը։ Նրա խոսքով՝ ոռոգման ջրի հետ կապված խնդիրների հիմնական պատճառը դրա անխնա օգտագործումն է։
-Մեր հասարակությունը պետք է գիտակցի, որ ջուրը պետական հարստություն է և այն հնարավորինս խնայողաբար օգտագործի։ Այս ուղղությամբ բացատրական աշխատանքներ ենք տանում: Ընդհանուր առմամբ, ոռոգման ջրի խնդիրը լուծելու համար ջրամբարներ ենք կառուցում։ Այսօր պետական ծրագրով առաջնայինը Պատարայի ջրամբարի կառուցումն է, որի միջոցով առաջին հերթին Ստեփանակերտի խմելու ջրի հարցն ենք լուծելու, ապա Ասկերանի շրջանի Այգեստանի, Հովսեփավանի, Աստղաշենի և Նորագյուղի մոտ 2500 հեկտար հողատարածք ոռոգովի ենք դարձնելու։ Պատարայի ջրամբարից բերվող ջրագծի աշխատանքներն ավարտման փուլում են։ Այս պահին ջրագծի փորձարկում ենք իրականացնում և միաժամանակ օգոստոսի 8-ից Ստեփանակերտ քաղաքին 50 լ/վրկ ջուր է մատակարարվում: Այդուհանդերձ, որպեսզի այդ համակարգը լիարժեք գործի, պետք է ջրամբարն ամբողջությամբ կառուցվի, որի աշխատանքները կավարտվեն նախատեսված ժամկետներում՝ 2025 թվականին,- մանրամասնեց մեր զրուցակիցը՝ նշելով, որ կառուցվում է նաև Հիլիսի ջրամբարը, որտեղ 450 հազար խորանարդ մետր ջուր է կուտակվելու։ Ջրամբարի շինաշխատանքների 80 տոկոսն արդեն ավարտվել է։
Ա. Խաչատրյանի հավաստմամբ՝ ոռոգման ցանցի ընդլայնման համար պետք է նախ ջրի աղբյուրներ ստեղծվեն: Նախևառաջ ոռոգովի են դարձնում այն տարածքները, որոնք մոտ են գտնվում ջրի աղբյուրին, որպեսզի աշխատանքները հեշտ լինեն, իսկ ծախսերը՝ քիչ։ Առաջնահերթություն է տրվում նաև առաջնագծին մոտ գտնվող գյուղերի հողատարածքներին, որպեսզի մարդկանց նաև ապահովեն աշխատատեղերով։ Նշեց, որ այսօրվա դրությամբ մեծ ներդրումներ են կատարել Մարտունու շրջանի Բերդաշեն գյուղում, որտեղ բնակչությունը հիմնականում զբաղվում է գյուղատնտեսությամբ, մասնավորապես՝ բանջարաբոստանային կուլտուրաների մշակությամբ և այգեգործությամբ։
-Պատերազմից հետո ջրի աղբյուրների մեծ մասը մնացել է թշնամու հսկողության տակ, այդ թվում՝ Մարտակերտի ոռոգման ջուրը, որի հետևանքով հարակից տարածքները ինքնահոս ջրով չեն կարողանում ոռոգել։ Այնտեղ նախատեսվում է կառուցել արտեզյան ջրհորեր։ Այն տարածքներում, որտեղ ոռոգման ջրի խնդիր է առաջանում, կառուցվում են նաև նոր ջրամբարներ։ Նշեմ, որ այս եղանակներով բոլոր հողատարածքներն էլ հնարավոր է ոռոգովի դարձնել՝ ելնելով պետության հնարավորություններից,-ասաց Ա. Խաչատրյանը և ավելացրեց, որ Ջրային կոմիտեն ոռոգման համակարգերի ներդրման համար 1500 հեկտար հողատարածքի պայմանագիր է կնքել, որից 1400-ը ոռոգովի են դարձրել։
Մեր զրուցակցից տեղեկացանք, որ պետությունը խթանում է ոռոգման ժամանակակից տեխնոլոգիաների՝ կաթիլային և անձրևացման համակարգերի ներդրմանը։ Մասնավորապես՝ կաթիլային ոռոգումը մեթոդ է, որի դեպքում ջուրը փոքր չափաբաժիններով մատակարարվում է բույսերի արմատային համակարգ։ Այն ապահովում է ջրի և այլ ռեսուրսների զգալի խնայողություն։ Ջրային ռեժիմի կարգավորման շնորհիվ աճում է մշակաբույսերի բերքատվությունը։ Այս երկու մեթոդները հիմնականում օգտագործվում են այգիների և բանջարաբոստանային կուլտուրաների ոռոգման համար։
-Պետք է գիտակցենք, որ առաջնագիծը միայն զինվորինը չէ, առաջնագծամերձ հողը մշակողն էլ է դիրքապահ։ Ջրային կոմիտեն էլ իր հերթին աջակցում է բնակչությանն այդ գործում,-ավելացրեց մեր զրուցակիցը։
Աննա ԱԼԵՔՍԱՆՅԱՆ