[ARM]     [RUS]     [ENG]

ԳՐԱՆՑՎԵԼ Է ԳՐԻՊԱՆՄԱՆ ՀԻՎԱՆԴՈՒԹՅՈՒՆՆԵՐԻ ՍԵԶՈՆԱՅԻՆ ԱՃ

altԱռողջապահության համաշխարհային կազմակերպության (ԱՀԿ) տվյալներով՝ փետրվարի երկրորդ կեսից Եվրոպայի  շատ երկրներում դիտվում են գրիպանման հիվանդություններով և սուր-շնչառական վարակների դեպքերի բարձր ցուցանիշներ՝ գրիպի վիրուսի հայտնաբերմամբ։ Հիմնականում շրջանառվում է գրիպի Ա (H1N1) ենթատեսակը։ Ինչ վերաբերում է  Վրաստանին, Թուրքիային, Ադրբեջանին, Ռուսաստանի Դաշնությանը, ապա այդ երկրներում  դիտվում է սուր-շնչառական վարակի և գրիպի միջին ինտենսիվություն։ Նշենք, որ դեռևս 2010 թվականից, այսպես կոչված, խոզի գրիպը՝՝ գրիպի Ա տեսակի H1N1 ենթատեսակը, չունի պանդեմիկ ուժ և համարվում է սեզոնային մարդկային գրիպի ենթատեսակ։ ԱՀԿ¬ի տեղեկատվությամբ՝ յուրաքանչյուր տարի սեզոնային գրիպի տարբեր տեսակներից աշխարհում մահանում է 3-5 միլիոն մարդ, որը կազմում է մահվան ընդհանուր դեպքերի 1-2 %¬ը։ 
ՀՀ առողջապահության նախարարության տվյալներով՝ Հայաստանում ներկայումս տարածված են  գրիպի Ա (H1N1, H2N3) և Բ տեսակները։ Յուրաքանչյուր տեսակի կամ ենթատեսակի դեպքում հնարավոր է հիվանդության միջին և ծանր ընթացք, ինչին կարող են նպաստել բժշկական օգնությանը ուշ դիմելը, ինքնաբուժումը, ուղեկցող և քրոնիկ  հիվանդությունները և այլն։ Առավել խոցելի են քրոնիկ հիվանդություն ունեցողները, հղիները, երեխաները և տարեցները։ 
ՀՀ ԱՆ¬ի կողմից իրականացվող մշտադիտարկման արդյունքներով՝ վերջին շաբաթվա ընթացքում արձանագրվել է սուր-շնչառական վարակների  1,4 անգամ աճ։ Փետրվարին  իրականացվել են շուրջ 210 լաբորատոր վիրուսային հետազոտություններ,  ինչի  արդյունքում 64 նմուշում հայտնաբերվել է գրիպի Ա տեսակի H1N1  ենթատեսակը, իսկ 21 նմուշում՝ Բ տեսակը։ Մնացած նմուշներում գրիպի հարուցիչներ չեն հայտնաբերվել։ Դիտարկման արդյունքները ցույց են տվել, որ գրիպի Ա տեսակի H1N1 ենթատեսակը նկատվում է  թե՜ թեթև և թե՜ ծանր հիվանդների շրջանում։ 
ԼՂՀ առողջապահության նախարարության պետական հիգիենիկ և հակահամաճարակային տեսչության պետ Օֆելյա Հարությունյանը տեղեկացրեց, որ հանրապետությունում այդ ուղղությամբ իրականացվում են  դիտարկումներ և վերահսկողություն։ 2013թ. փետրվարի 1-15¬ը ԼՂՀ-ում գրանցվել է վերին շնչառական հիվանդությունների սուր վարակի նվազում՝ անցյալ տարվա նույն ժամանակաշրջանի համեմատ, սակայն փետրվարի երկրորդ կեսին նկատվել է  այդ  վարակի և գրիպանման հիվանդությունների աճ։  Փետրվար ամսին ընդհանուր առմամբ գրանցվել է 2082 դեպք, որից 1756-ը՝ մինչև 18 տարեկան երեխաների մոտ։ Շտապ օգնության կանչերը նույնպես աճել են։ Եթե հունվար ամսին գրանցվել է 970 կանչ, որից 68-ը սուր-շնչառական վիրուսային հիվանդությունների դեպքում, ապա փետրվարին՝ 1085 կանչ, որից 96-ը՝ նշված հիվանդություններով։  Փետրվարի 28-ի դրությամբ, հանրապետության տարածքում հոսպիտալացվել է 108 մարդ, որից 98-ը՝ մինչև 18 տարեկան երեխաներ։ Դիտարկումները շարունակվում են բոլոր նախադպրոցական և ուսումնական այլ  հաստատություններում։ Պարապմունքներից  բացակայողների թիվը կազմում է 3,5-6%։ ԼՂՀ  ԱՆ¬ն վերին շնչուղիների սուր հիվանդություններով և գրիպանման վարակներով տառապող անձանց 15 նմուշ ուղարկվել է Հայաստանի համապատասխան բուժհիմնարկներ՝  հետազոտությունների համար. երեքի մոտ հայտնաբերվել է վիրուսային Ա (H1N1) գրիպի ենթատիպը։ Այդ  հիվանդները ստանում են  տամիֆլյու դեղորայքը։ Նախարարությունը Հայաստանից ստացել է նշված դեղորայքի նոր չափաբաժին ու բժշկի նշանակման դեպքում   այն անվճար կտրամադրվի հիվանդներին։  
Համաճարակային իրավիճակի բարդացումներից խուսափելու համար նախարարությունը հորդորում է գրիպանման երևույթների առկայության դեպքում մնալ տանը, չհաճախել մանկապարտեզ, դպրոց և այլն։ Խորհուրդ է տրվում չզբաղվել ինքնաբուժմամբ, անհարկի չօգտագործել հակաբիոտիկներ, չշփվել գրիպով  վարակված մարդկանց հետ, հաճախակի օդափոխել  այն սենյակը, որտեղ գտնվում է հիվանդը։ 
 
 
 
Զարինե ՄԱՅԻԼՅԱՆ