ԲՆԱՊԱՀՊԱՆԱԿԱՆ ՈԼՈՐՏԸ՝ ՏԵՍՉԱԿԱՆ ՈՒՍՈՒՄՆԱՍԻՐՈՒԹՅՈՒՆՆԵՐՈՒՄ

 Տեսչության կողմից վերահսկվում է նաև բնապահպանական պետական  փորձաքննության, բնապահապանական և բնօգտագործման վճարների հաշվառման կարգը, իրականացվում է բնապահպանական վարչական վիճակագրություն: Այս գործառույթները ճյուղաբաժանված են, սակայն տեսչությունը հիմնական գործունեություն է ծավալում շուրջ 10 ենթագործառույթների շրջանակներում, որոնց մասին նշվեց սկզբում: Մեր տեսչությունն իր վերահսկողական գործառույթներն իրականացնում է թեմատիկ ստուգումների և հանրապետության տարածքով շրջագայությունների միջոցով: Մեզ համար հիմք են ծառայում նաև տեղական ինքնակառավարման և պետական մարմինների, կազմակերպությունների և քաղաքացիների բողոքները: Կազմակերպվում են նաև համապատասխան օրենսդրության կատարման   ստուգումներ:

- Ի՞նչ լիազորություններ ունի բնապահպանության տեսուչը:

- Բնապահպանության պետական տեսուչն իր պարտականությունների կատարման ընթացքում առաջնորդվում է ՙԲնապահպանության մասին՚ օրենքով, ԼՂՀ այլ օրենքներով ու իրավական  ակտերով և լիազոր մարմնի սահմանած մեթոդական ցուցումներով: Տեսչության ներկայացուցիչներն իրականացնում են անկողմնակալ վերահսկողություն բնապահպանական օրենսդրության պահանջների կատարման նկատմամբ, արձանագրում բնապահպանական օրենսդրության խախտման դեպքերը և իրավասության սահմաններում տալիս համապատասխան ընթացք: Բնապահպանական օրենսդրության խախտում հայտնաբերելու դեպքում մենք անց ենք կացնում քննություն, իսկ հանցագործության հատկանիշներով բնապահպանական օրենսդրության խախտման դեպքերի մասին իրազեկվում են իրավապահ մարմինները: Մեր տեսուչներն իրավունք ունեն ստուգվող սուբյեկտներից պահանջել փաստաթղթեր, տվյալներ, բացատրություններ և անհրաժեշտ այլ փաստաթղթեր, ինչպես նաև վերցնել փորձանմուշներ և կատարել կապարակնքում: Օրենքով և իրավական այլ ակտերով սահմանված կարգով որոշ դեպքերում առգրավվում են ապօրինի ձեռքբերված բնական ռեսուրսները և բնապահպանական օրենսդրության պահանջների խախտմամբ ձեռքբերված որսը և որսագործիքները: Բնապահպանական օրենսդրության վերաբերյալ մենք նաև իրականացնում ենք բացատրական աշխատանքներ, եթե անհրաժեշտություն կա` ներգրավելով մասնագետների և փորձագետների:

 - Տարվա ընթացքում ձեր կողմից իրականացված ստուգումներով ու շրջայցերով ի՞նչ բացահայտումներ եք արել:

- Ստուգումների արդյունքում գործերի քննության գրանցամատյանում գրանցվել է 60 գործ: Պետք է ասել, որ բացահայտված  խախտումները կրում են ՙավանդական՚ բնույթ, այն է` բուսական և կենդանական աշխարհի, ինչպես նաև մթնոլորտային օդի և ջրային ռեսուրսների պահպանության կանոնների խախտումներ: Համեմատաբար մեծ թիվ են կազմում անտառախախտման (16) և  ապօրինի ծառահատման (7) գործերը: Ջրօգտագործման թույլտվության ստուգման արդյունքում բացահայտվել է  17 խախտում՝ լիցենզիայի  մասով: Գրանցվել է ապօրինի որսորդության 12 դեպք, հիմնականում` արգելված որսաշրջանի ընթացքում գործելու համար, ապօրինի  ընդերքօգտագործման 1 դեպք. քաղաքացին Մարտունու ճանապարհահատվածի շինարարության ժամանակ  անօրեն զբաղվել է խճի արդյունահանմամբ: Մեր տեսուչները բացահայտել են նաև ապօրինի ձկնորսության  4 դեպք:

 

Նունե ՀԱՅՐԱՊԵՏՅԱՆ