ԼԵՌՆԱՅԻՆ ՂԱՐԱԲԱՂԸ ԵՎ ՆՐԱ ԿԵՆՏՐՈՆ ՇՈՒՇԻՆ ՄԻՆՉԵՎ 1917թ. ՓԵՏՐՎԱՐՅԱՆ ՀԵՂԱՓՈԽՈՒԹՅՈՒՆԸ
Աբրահամ ԿԻՍԻԲԵԿՅԱՆ
(Հատվածներ Աբրահամ Կիսիբեկյանի ՙՀուշեր՚ գրքից)
1.ՇՈւՇԻ
Ես ցանկանում եմ այս փոքրիկ ակնարկով ընթերցողին իրազեկ դարձնել, թե մինչև փետրվարյան հեղափոխությունն իրենից ինչ էր ներկայացնում Լեռնային Ղարաբաղը՝ իր կենտրոն Շուշի քաղաքով։
Շուշին, ինչպես ղարաբաղցին է անվանում՝ ՙՇուշվա ղալան՚, բազմաթիվ տարիների փառահեղ, կուլտուրական կյանք ունեցող այդ դրախտավայրը հանդիսացել է Լեռնային Ղարաբաղի կենտրոն-մայրաքաղաքը, նրա գլխավոր զարկերակը, նրա վարչական, մտավոր ու կուլտուրական կենտրոնը, նրա հրաշալի ու անզուգական զարդը։
Այդ վայրը մոտ գտնվելով Շոշու գյուղին, անցյալում ծառայել է նրան որպես արոտատեղի, ու այնտեղ են գտնվել նրա բինաները։
Պատմական տվյալները վկայում են, որ Վարանդայի Մելիք Շահնազարյանը, դավաճանելով Ղարաբաղի հայ ժողովրդին՝ Փանահ խանի պես ոխերիմ թշնամու հետ դաշնակցելով ու աջակցելով նրան, տեղ տվավ այդ բարձունքի վրա՝ կառուցելու Շուշվա բերդը։
Մելիք Շահնազարն իր այդ քայլով Ղարաբաղի հայ ժողովրդի հանդեպ կատարեց սոսկալի ոճրագործություն, որի համար պատմությունը նրա սև ճակատին դավաճանի անուն դրոշմեց, և մեր սերունդները, նրան հիշելով, միշտ անիծում են և կանիծեն որպես հայրենիքի դավաճանի, որի շնորհիվ օձը բուն դրեց Ղարաբաղի սրտում։
Շուշին, ամրության տեսակետից խոցելի լինելով միայն արևելյան կողմից, նրանք այդտեղ էլ կառուցեցին բերդը՝ շրջապատելով թե՜ բերդը և թե՜ քաղաքը պարիսպներով ու բուրգերով։ Թե՜ բերդը և թե՜ պարիսպները կառուցել են Մելիք Շահնազարն ու Փանահ խանը միասին` հայ վարպետների ու բանվորների ձեռքով։
Շուշին գտնվում է խորդուբորդ մի լանջի վրա, որի արևելյան ստորին ծայրամասից՝ ներքին դարպասից, աստիճանաբար բարձրանալով՝ հասնում է նրա արևմտյան ծայրամասի բարձրագույն գագաթին՝ Քերծին գլխին, որը ներքին դարպասից բարձր է մոտ 300-350 մ։
Քաղաքի հարավային, արևմտյան և հյուսիս-արևելյան կողմերը շրջապատված են լեռներով և անդնդախոր ձորերով և անխոցելի են։
Հարավ-արևելյան (Սանգարի) կողմից շրջապատված պարիսպները և բուրգերը, որոնք այսօր ծվատված հսկայի տեսք ունեն, հանդիսանում են որպես վաղուց անցած տխուր օրերի դժբախտ հուշարձաններ։
Փանահ խանն իր ձեռքով հիմք դնելով բերդին, իր հրամանով բերդը կոչվեց ՙՓանահաբադ՚, սակայն շուտով կորավ այդ տհաճ անունը և կոչվեց ՙՇուշվա ղալա՚։
Բերդի հիմնադրումը կատարվեց 1752-1754թթ.։ Այսպիսով Շուշին գերեզման դարձավ Ղարաբաղում մելիքական կազմակերպության։
Րաֆֆին ՙՂարաբաղի աստղագետ՚ իր վիպակում ասում է. ՙՇուշին պտուղ էր հայ մելիքների անմիաբանության, և կործանեց առաջ ու առաջ հայ մելիքներին՚։
Այսպես թե այնպես, Շուշվա բերդը և նրա պարիսպները Լեռնային Ղարաբաղի հայ ժողովրդի դարավոր տառապանքների ու հերոսական սխրանքների և նրա գլխով անցած հինավուրց փոթորիկների լուռ ու համր վկաներն են, որոնք նրա պատմական անցյալն ավելի են հետաքրքրական դարձնում։
Շուշին գտնվում է այն գլխավոր ճանապարհի վրա, որով պատմական Սյունիքը կապվում է պատմական Արցախի հետ։ Այդ կետն իր բնական դիրքով բարձր է ծովի մակերևույթից 1500մ։
Նրա կլիման մեղմ է և առողջարար. ամառը՝ հով ու զով, աշունն ու գարունն՝ աննման, իսկ ձմեռը՝ համեմատաբար ցուրտ ու երկար։ Ձմեռը փողոցները պատում էին սառույցով, մարդիկ սահնակներով զբոսնում էին, իսկ ջահել տղաներն էլ սղղում էին սառույցների վրայով։
Քաղաքը խորասուզված էր պտղատու այգիների ու պարտեզների մեջ, որտեղ աճում էր փարթամ բուսականություն, որը հարուստ էր անուշահոտ ու անուշահամ պտուղներով։ Այդտեղ աճում էին բոլոր տեսակի պտուղները, բացի խաղողից։ Այստեղի պտուղներից հայտնի էին ձմեռային տանձը, սերկևիլը, խնձորը, սալորը և այլն։
Շուշին իր սկզբնական շրջանում շատ նեղություն էր կրում ջրի սակավության պատճառով։ Քաղաքի հայկական մասում կար ընդամենը երեք աղբյուր, այն էլ սակավաջուր. աղբյուրներից մեկը գտնվում էր վերին դարպասի մոտ՝ զորանոցին կից, երկրորդ աղբյուրը գտնվում էր քաղաքի կենտրոնական մասում, որը կոչվում էր ՙՍեյրանանց աղբյուր՚։ Երրորդը գտնվում էր թուրքական սահմանում և կոչվում էր ՙԽանին աղջկա աղբյուր՚։
Ձմեռվա ցուրտ օրերին այդ աղբյուրները սառչում էին և հասարակությունն ստիպված էր լինում գործածել հորերի ջուրը, որով Շուշին հարուստ էր, կամ գործածել ձյունի ջուր։
Շուշվա բնակիչ, ամբողջ հասարակությանը հայտնի ու նրա կողմից հարգված Թամիրանց Թաթոսը, որը մեծ հարստության տեր էր, քաղաքից դուրս կառուցել է տալիս կավե խողովակներ (ՙթունգա՚) պատրաստող մի գործարան և այդ թունգաներով քաղաքից մոտ 15-17 կմ հեռավորության վրա գտնվող առողջարար ու սառնորակ ջուրը բերում քաղաք։ Այդ ջուրը մինչև քաղաք բերելը, խմելու ջուր էին մատակարարում հատուկ մարդիկ, որոնք կոչվում էին ՙջրկիրներ՚ կամ ՙսուչիներ՚։ Նրանք ջուր էին բերում քաղաքից դուրս գտնվող սառնորակ, քաղցրահամ աղբյուրներից՝ Ղարաբուլաղից, իսկ լվացքի ու կենցաղային զանազան կարիքների համար՝ իրենց բակերում գտնվող ջրհորերից։ Հասարակությունը լվացքի ու գլուխ լվանալու ջուրը գործ էր ածում բացառապես այդ ջրերից։
Ջրկիրները կամ ՙսուչիները՚ ունեին 1-2 էշ, որոնց վրա էին բարձում երկու փոքրիկ, կլոր և տափակ տակառներ, որոնք տեղավորում էին 1-2 կուժ ջուր։ Այդ տակառների կլոր կողմերի վրա ամրացրած են մի փոքրիկ շղթայի երկու ծայրերը, իսկ շղթայի կենտրոնից՝ մի կեռ, իսկ մյուս տակառի շղթայի կենտրոնից՝ մի օղակ։ Տակառները ջրով լցնելով և բարձելով էշին՝ կեռը ձգում են օղակը և, այդպիսով, առանց որևէ պարանի քշում էշը։
Այդ ջրկիրներից նշանավոր էր Գյանջում անունով մի մարդ, որն ուներ սեփական 3-4 էշ, որոնցով ամբողջ ժամանակ ջուր էր բերում գլխավորապես քաղաքի մեծամեծ ընտանիքների համար։
Քաղաքը լուսավորելու խնդիրը մեծ չափով զբաղեցրել է նրա առաջավոր մարդկանց։ Տներում վառում էին նավթի ճրագներ, իսկ փողոցները լուսավորում լապտերներով, մի քանի տեղ գործ էին ածում նաև գազի լապտերներ։ Կային հատուկ վարձու մարդիկ, որոնք փայտե փոքրիկ սանդուղքները վերցրած՝ շրջում էին փողոցները և ամեն օր լապտերները լցնում նավթով ու մաքրում ապակիները։
Մինչև 1905թ. հայ-թուրքական ընդհարումները Շուշի քաղաքացի Յուզբաշյան Մոսես-բեկը բերում է Քարինտակ գյուղում գտնվող Հարունանց Դանիելի մետաքսի գործարանից էլեկտրական լույս և իր ու իր մի քանի հարուստ հարևանների տներն ու Ագուլյաց եկեղեցու թաղում թուրքաց սահմանակից մի քանի փողոցներ լուսավորում։ 1905թ. հայ-թուրքական կռիվների պատճառով այրվում է քաղաքի բարեկարգ այդ թաղամասը, և փչանում է նաև էլեկտրական լույսը։
Վերջին ժամանակները քաղաքային ինքնավարությունը պատրաստվում էր էլեկտրական լույս անցկացնելու, սակայն այդ գեղեցիկ նախաձեռնությունը մնաց անկատար՝ քաղաքի ավերման պատճառով։
Շուշին շատ վաղուց ուներ իր կոյուղին, երբ այն ժամանակ Անդրկովկասի քաղաքներից շատերը չունեին։
2. ՄԻ ՔԱՆԻ ԽՈՍՔ
ՃԱՆԱՊԱՐՀՆԵՐԻ
ԵՎ ՏՐԱՆՍՊՈՐՏԻ ՄԱՍԻՆ
Քաղաքն իր շրջակայքի հետ հարաբերության մեջ էր գտնվում երեք ճանապարհներով։
ա) Միակ խճուղին, որ թուրքական մասից սկիզբ է առնում և անցնում հայկական հին գերեզմանատան միջով և այդ բարձրությունից ոլորապտույտ կերպով իջնելով մոտ 7-8կմ՝ հասնում է ՙՄազի կամուրջին՚, որտեղից շարունակվելով՝ Խաչենի և Ասկերանի բերդի միջով հասնում է Աղդամ։ Շուշին այս խճուղու միջոցով էր կապվում Եվլախ կայարանի հետ, որը կոչվում էր Շուշի-Եվլախ խճուղի։
բ) Երկրորդ ճանապարհն սկիզբ է առնում քաղաքի ներքին դարպասից և աստիճանաբար ցածրանալով մոտ 7-8 կմ՝ հասնում է գետին և մտնում պատմական Վարանդայի շրջանը։
Այդ ճանապարհով երթևեկում էին մարդիկ միմիայն գրաստներով. այս ճանապարհով սայլերով երթևեկելը հնարավոր չէր։
գ) Երրորդ ճանապարհն էլ սկիզբ է առնում քաղաքի վերին դարպասից և կամուրջի նման անցնում դեպի արևմուտք՝ Թթու ջուրը, Ղարաղշլաղ հայկական գյուղը և այնտեղից էլ՝ դեպի Գորիս, և կոչվում էր Շուշի-Գորիս խճուղի։
1900-ական թթ. սկսած՝ Շուշվա առաջավոր մարդիկ աշխատել են Շուշին կապել Եվլախ կայարանի հետ՝ երկաթուղագծով։
1907-1908թթ. Շուշիի քաղաքացի հայտնի հարուստ Սարուխանյանն սկսեց կառուցել այդ գիծը։ Նա վերջացրեց հողային աշխատանքները։ Կառուցեց կամուրջները և որ պետք է անցկացներ երկաթգիծը, սկսեցին երկրում տեղի ունենալ այնպիսի դեպքեր, որոնք հնարավորություն չտվին վերջացնելու կառուցումը ու չհաջողվեց քաղաքը երկաթուղագծով կայարանի հետ կապել։
Ղարաբաղը, բավականին հեռու գտնվելով Եվլախ կայարանից և չունենալով կազմակերպված, կանոնավոր փոխադրական միջոցներ, մեծ դժվարություններ էր կրում։
Շուշիից կամ շրջաններից կայարան ծանրություններ փոխադրելը կամ կայարանից Շուշի՝ կատարվում էր եզների ու գոմեշների սայլերով կամ փուրգոններով, իսկ մարդկանց տեղափոխելը կատարվում էր գլխավորապես փուրգոններով և դիլլիջաններով, իսկ փոխադրվողների մի չնչին մասը միայն հնարավորություն ուներ ֆայտոնով փոխադրվելու, որովհետև մեծ գումարներ էին պահանջվում։ Տրանսպորտը գլխավորապես մասնավոր մարդկանց սեփականություն էր։
Բացի դրանից կային երկու ակցիոներական տրանսպորտային ընկերություն.
հ.կ.ը. րՑՐՈւՏՉՈվ. ԿոքպրՑՉՏ ‘’ծՈՊպՋՊՈ’’.
հՑՐՈւՏՉՈվ. ԿոքպրՑՉՏ ‘’ՀՏրրՌÿ’’.
Այս ընկերությունները ստանում էին բեռներ ու հանձնում իրենց տերերին։
Այս ընկերությունները Շուշիից տեղափոխում էին ծանրություններ, իրեր, մարդկանց՝ Եվլախ կայարանը։
Եվլախից Շուշի տեղափոխությունը կատարվում էր Ներսես Մարգարի Մելիք-Փաշայանի տրանսպորտային հիմնարկի միջոցով, որը գտնվում էր Եվլախ կայարանում, սակայն այս փոխադրական բոլոր միջոցներն անբավարար ու անկանոն էին։
(Սկիզբը՝ ՙԱԱ՚« թիվ 35« 37« 38, 39, 58)
(Շարունակելի)