ԼԵՌՆԱՅԻՆ ՂԱՐԱԲԱՂԸ ԵՎ ՆՐԱ ԿԵՆՏՐՈՆ ՇՈՒՇԻՆ ՄԻՆՉԵՎ 1917թ. ՓԵՏՐՎԱՐՅԱՆ ՀԵՂԱՓՈԽՈՒԹՅՈՒՆԸ
Աբրահամ ԿԻՍԻԲԵԿՅԱՆ
(Սկիզբը՝ ՙԱԱ՚« թիվ 35« 37« 38, 39, 58)
(Հատվածներ Աբրահամ Կիսիբեկյանի ՙՀուշեր՚ գրքից)
ԱԶԳԱԲՆԱԿՉՈՒԹՅՈՒՆԸ
Շուշվա հայոց եկեղեցիների անուններով բնորոշվում է նրա բնակիչների զանազան վայրերից գաղթած լինելը Շուշի։
Նրանք գաղթել են Հին Նախիջևանի գավառի Ղազանչի գյուղից, Ագուլիսի և Մեղրու շրջաններից։ Գալով Շուշի՝ կազմում են իրենց թաղերը ու կառուցում իրենց եկեղեցիները։
Ագուլիսից մի մեծ հատված, ազատվելով կոտորածից, գաղթում է Շուշի։
Ագուլիսեցիներն ու ղազանչեցիները կազմել են Շուշվա նախնական ազգաբնակչությունը։
Հետագայում Ղարաբաղի զանազան շրջաններից էլ գալիս են և այդ թաղերում բնակություն հաստատում։ Բացի դրանից, շատերը կազմում են առանձին թաղ, որը կոչվել է ՙՆերքին թաղ՚։ Նրանք նույնպես կառուցել են եկեղեցի, որը կոչվել է ՙԱստվածածնա եկեղեցի՚։ Նա ունեցել է նաև ուխտատեղի, որը կոչվել է ՙՔամու խաչ՚։
Ներքին թաղի բնակիչները, խիստ նեղվելով իրենց հարևան թուրքերից, 1840թ., թողնում են իրենց ամբողջ թաղը, եկեղեցին, Քամու խաչ սրբավայրը և գերեզմանատունը ու տեղափոխվում, քաղաքի հյուսիսային կողմը գտնվող բարձունքի վրա բնակություն հաստատում, շինում նոր եկեղեցի, որը կոչում են ՙԹազա ժամ՚, իսկ թաղը՝ ՙՎերին թաղ՚։
Բացի այդ թաղերից, քաղաքն ուներ ևս մի թաղ, որը կոչվում էր ՙՄեղրեցոց թաղ՚։ Սա ուներ եկեղեցի՝ կառուցված փայտից, բայց հետագայում կառուցեցին քարից ու կրից։
Պատմական տվյալների համաձայն՝ Ագուլյաց եկեղեցին ուներ 447 ծուխ, Ղազանչեցոց՝ 367 ծուխ, իսկ Մեղրեցոց եկեղեցին՝ 102 ծուխ։
Վերոհիշյալ թվերը վերաբերվում են միայն դրսից գաղթածներին։
Գաղթածներն ապրելով Ղարաբաղում` տեղական բնակիչների հետ, ենթարկվում են նրանց ազդեցության, կորցնում իրենց բարբառները և կենցաղային առանձնահատկությունները։
Բացի վերոհիշյալ պատմական տվյալներից, ժողովուրդը մեզ պատմում է մի ավանդություն, որ իբր թե Փանահ խանը ցանկանալով քաղաքում ունենալ առևտրական և արհեստավորական բնակիչներ, դիմում է Նախիջևանի խանին՝ խնդրելով տեղի հայ բնակիչներին առաջարկել և աջակցել Շուշի տեղափոխվելու։ Նախիջևանի խանն իբր թե ընդառաջելով Փանահ խանին, առաջարկում է հայերին, որ ովքեր ցանկանում են, կարող են տեղափոխվել Շուշի։
Շուշվա հիմնական բնակիչներն են հայերը և թուրքերը, բացի դրանից ապրում էին նաև ռուսներ, քրդեր, թաթարներ, պարսիկներ և այլն։
Շուշին, ըստ ՙԿավկազսկի կալենդարի՚ 1914թ. տվյալների, ունեցել է ընդամենը 42 568 շունչ, որն ըստ ազգությունների արտահայտվել է հետևյալ կերպ.
1.Հայեր՝ 22416 շունչ
2.Թուրքեր՝ 18865 շունչ
3.Ռուսներ՝ 1188 շունչ
4.Այլք՝ 99 շունչ
Ընդամենը 42568 շունչ:
Չնայած ամբողջ քաղաքը գտնվում էր միևնույն բնության ծոցում, սակայն իրենց արտաքին տեսքով, կուլտուրականությամբ, շինարարությամբ ու հոյակապությամբ խիստ տարբերվում էին իրարից։
Բազմաթիվ տասնամյակների ընթացքում այդ երկու հարևան ժողովուրդները հանդես են եկել իրենց ստեղծագործական ընդունակություններով՝ կուտակելով խոշոր հարստություն՝ թողնելով իրենց հետագա սերունդներին որպես անգնահատելի ժառանգություն։
Հայերը բնակվում էին քաղաքի արևմտյան, հյուսիսային և հյուսիս-արևելյան մասերում, իսկ թուրքերը՝ արևելյան և հարավային մասում։
Այդ երկու քաղաքամասերը սահմանազատված էին։
ԶԲԱՂՄՈՒՆՔԸ
Շուշվա հայ բնակչությունն զբաղվում էր տնայնագործությամբ, արհեստներով, առևտրով՝ վաճառականությամբ և հիմնարկներում աշխատելով։ Արհեստավորներն զբաղվում էին կոշկակարությամբ, դերձակությամբ (ասիական և եվրոպական), ժամագործությամբ, ատաղծագործությամբ, թիթեղագործությամբ, ոսկերչությամբ, հյուսնությամբ և այլն։
Կային բազմաթիվ կոշկակարներ, որոնք մեծ մասամբ կարում էին չմուշկներ՝ թե՜ կանանց և թե՜ տղամարդկանց։
Այստեղ առաջնակարգ տեղ էր բռնում առևտուրը։ Խոշոր առևտրականներին կից կային նաև բազմաթիվ մանրավաճառներ, որոնք հասարակությանը մատակարարում էին արդյունաբերական ապրանքներ ու կենսական անհրաժեշտ զանազան մթերքներ. սրանց էր թողնված ասպարեզն ամբողջապես։
Շուշիում առևտուրն ամբողջովին գտնվում էր հայերի ձեռքին։ Խոշոր առևտրականներն ստանում էին արդյունաբերական ապրանքները Ռուսաստանից և Լեհաստանի կենտրոնական քաղաքների ֆաբրիկաներից ու գործարաններից, օրինակ Մոսկվա և Լոձ։ Շուշվա թուրք վաճառականները, ինչպես և առանց բացառության Զանգեզուրի և Ղափանի վաճառականները, բոլորն էլ Շուշվա հայ խոշոր վաճառականների կլիենտներն էին. նրանցից ստանում էին մանուֆակտուրա և վաճառում իրենց շրջաններում։
Շուշվա խոշոր վաճառականներից հայտնի էին ՙՍյունիք՚ և ՙՊատիվ՚ ընկերությունները, Մկրտչյան և Բաբայան եղբայրները, Մելքում Խաչատրյան, Զախար Մասկյան, Իսախանյան, եղբայր Եսայաններ, Վարանցով, եղբայր Ղազարյաններ և այլն, կարելի է տասնյակներով թվել։
Այստեղ էր գտնվում ՙԶինգերի՚ գործակալությունը, որը հասարակությանը տալիս էր ՙԶինգեր՚ կոչված կարի մեքենաներ։
Այսպիսով Շուշին խոշոր առևտրական կենտրոն էր։
Շուշվա, ընդհանրապես Ղարաբաղի արհեստավորությունը, շատ հայտնի էր իր շինարարական աշխատանքներով։ Անդրկովկասի և անդրկասպյան երկրների շինարարության մեծ մասը կատարվում էր Ղարաբաղի արհեստավորների ձեռքով։ Քաղաքի ծայրամասերում պահում էին մեծ քանակությամբ անասուններ ու թռչուններ և, այսպիսով, քաղաքի բնակչությանը մատակարարում որոշ չափով կենսամթերքներ։
ՇՈՒՇՎԱ ԲՆԱԿՉՈՒԹՅԱՆ
ՇԵՐՏԱՎՈՐՈՒՄԸ
Կային շատ քաղաքացիներ, որոնք ապրում էին ռենտայով՝ անաշխատ եկամուտով։ Նրանք իրենց դրամագլուխները տալիս էին տոկոսներով, բնակարանները վարձով և այլն։
Դրանք նախկին խոշոր՝ մեծաքանակ առևտրով զբաղվող մարդիկ էին, որոնք կապ ունեին պարսկական, ռուսական և եվրոպական շուկաների հետ։ Սրանք, դիզելով մեծ կարողություն, իրենց ծերության հասակում ապրում էին Շուշիում։
Երկրորդ կարգի մարդիկ էին մեծաքանակ առևտրականները, որոնք կապ ունենալով ֆիրմաների հետ՝ ապրանքներ էին ստանում և մատակարարում թե՜ քաղաքում և թե՜ Շուշվա, Զանգեզուրի, Խաչենի, Ջիվանշիրի շրջաններում՝ ունենալով, միևնույն ժամանակ, իրենց մանրածախ խանութները։ Կային մանրածախ առևտրականներ, որոնք դարձյալ կապ ունենալով Մոսկվայի և Լոձի գործարանների հետ՝ ստանում էին ապրանքներ և վաճառում իրենց խանութներում։
Կային մեծ քանակությամբ մրգավաճառներ, որոնք վաճառում էին թե՜ տեղական և թե՜ Պարսկաստանից ստացած չոր մրգեր։ Քաղաքն ուներ մեծ քանակությամբ արհեստավորներ, որոնք ունեին իրենց համքարությունները, որոնցից յուրաքանչյուրը ուներ, ըստ իր արհեստի, իր դրոշակը, ներքին կանոնադրություն և այլն։
Առանձնապես աչքի էր ընկնում պղնձագործների համքարությունը։
Կային ջրկիրներ, մշակներ և սևագործ բանվորներ։
Քաղաքի թոփխանայում կային բազմաթիվ բեռնակիրներ (ՙհամբալներ՚) որոնք սպասում էին՝ քաղաքացիների ծանրոցները տեղափոխելու համար և ստանում իրենց վարձը։ Սրանք մեծ մասամբ պարսկահպատակներ էին՝ եկած Ղարադաղից՝ հայեր և պարսիկներ։
ՇՈՒՇՎԱ ՇՈՒԿԱՆ
Շուշին ուներ ճոխ ու հարուստ շուկա, որը ողողվում էր հեռու ու մոտիկ, հայ ու թուրք գյուղացիության բերած գյուղատնտեսական և այլ տեսակի մթերքներով։
Քաղաք էին բերում հացահատիկներ, ալյուր, միս, կաթնամթերքներ, խմիչքներ, թռչուններ, կենդանիներ, վառելիք, բանջարեղեն, պտուղներ, բուրդ, բամբակ և այլն։
Շուշվա բնակչությունն իր նիստ ու կացով, իր կենցաղավարությամբ հայաշատ քաղաքների շարքում ուրույն ու բացառիկ տեղ էր գրավում։ Շուշեցի հայ ընտանիքը, համաձայն նրա նախնիների սովորության, ունևոր, թե չքավոր, յուրաքանչյուրն իր միջոցների համաձայն, օգոստոսից մինչև հոկտեմբեր աշխատում էր ամբողջ տարվա իր պաշարը պատրաստել։ Նա իր տանը պետք է ունենար այն ամենը, ինչ գործադրվում էր իր տնտեսության մեջ։
Նա յուրաքանչյուր տարվա սկզբին պատրաստում էր ամբողջ տարվա համար ա) վառելիք, բ) սննդամթերքներ, գ) հագուստ։
Այժմ կանգ առնենք դրանց վրա առանձին-առանձին։