... ՈՒ ԱՅՍՊԵՍ ԷԼ ԱՊՐՈՒՄ ԵՆ
Կարինե ԴԱԴԱՄՅԱՆ
Նանար և Վանյա Շաքարյանների երիտասարդ ընտանիքը երկու որդիների հետ ապրում է Թաղավարդ համայնքի Թաղավարդ Կալեր հատվածում՝ Վանյայի պապենական օջախում՝ հրետակոծված ու ավերակների վերածված Չուրվիշ սրբավայրի հովանու ներքո։
Հենց տան բակում էլ թշնամու արկը պայթել է, ամբողջապես վնասվել է նոր վերանորոգված տունը։ Այդ տանը երիտասարդ ընտանիքն այդպես էլ չհասցրեց ապրել, որոշ գործեր էլ դեռ կիսատ էին մնացել։ Հիմա արդեն բավականին աշխատանքներ են կատարվել, բայց անելիք դեռ շատ կա։ Տանտերերը նոր կահույք ու անհրաժեշտ կենցաղային իրեր չեն շտապում գնել՝ վաղվա անորոշությունը խանգարում է։
Նանարը երեխաների հետ զինադադարից հետո՝ դեկտեմբերի 2-ին է Հայաստանից վերադարձել գյուղ, 3 օր մնացել ու քանի որ ապրելու հնարավորություն չկար՝ Ստեփանակերտում ժամանակավոր կացարան են վարձել, երեխաների հետ մի որոշ ժամանակ հաստատվել այնտեղ, մինչև համեմատաբար կարգի բերվեց տունը և հնարավոր եղավ վերադառնալ, ապրել հարազատ օջախում։ Երեխաներն ամեն օր լաց էին լինում՝ մայրը Ստեփանակերտում մի կերպ է պահել, գյուղ՝ տուն էին ուզում գնալ։
Տան դիմացի բլրին հակառակորդի դիրքն է։ Նանարն ասում է, երբ սկսում են կրակել, երեխաներին համոզում է՝ որոտում է։ Ինքն էլ է փորձում հավատալ իր ասածին, մի տեսակ սովորական է դարձել։ Իմ հարցին՝ չի՞ վախենում, խոժոռված պատասխանում է՝ ինչի՞ց պիտի վախենա։ Շատ բաների միջով է անցել ու, կարծես, անցածն ու ապրածը բթացրել են իր մեջ վախի զգացումը։
Արցախյան առաջին պատերազմում նահատակվել է Նանարի հայրը։ Նրան շատ լավ ծանոթ են որբության ծանրությունն ու կորստի ցավը։ Ուստի առաջին հերթին փառք է տալիս Աստծուն, որ ողջ-առողջ են։ Ինչքան էլ ինձ համար զարմանալի էր՝ բոլոր կողմերից հակառակորդի դիրքերով շրջապատված գյուղի երիտասարդ տանտիկինը հավատով է խոսում ապագայի մասին, իր ծրագրերն ու հույսերը` կապված ապագայի հետ, գյուղում է տեսնում։ Ուրիշ որտե՞ղ պիտի փնտրի. այստեղ իր տուն ու տեղն է, այստեղ իր անցյալն ու ամեն ինչն է։
2020թ. ապրիլի 6-ին էր Շաքարյանների ընտանիքը տեղափոխվել պապիկի տուն։ Օգոստոսին հիմնական շինաշխատանքներն ավարտել էին։ Ամեն ինչ մանրակրկիտ ու սիրով էին արել, աշխատել` շինանյութի ու կահույքի գինն անտեսելով` որակ ապահովել. մեկ օրվա համար չէր, հետո էլ՝ միշտ չեն հնարավորություն ունենա. երեխաները մեծանում են, խնդիրները՝ շատանում, հալալ քրտինքով չես կարող շատ բան հետ գցել։ Պիտի վայելեին, բայց թշնամին չթողեց։ Ասում է՝ ո՜չ առաջինն են, ո՜չ էլ վերջինը։ Պատմում է, բայց առանց ափսոսանքի. երկու տարվա աշխատածը դրել էին տան վրա.... Սկզբից ծանր է տարել, բայց հետո համակերպվել է։
11 և 8 տարեկան են երեխաները՝ Նարեկն ու Տիգրանը։ Գյուղի դպրոցն են հաճախում։ Ընդհանրապես, չեն վախենում։ Երևի այն պատճառով, որ պատերազմական գործողություններին ու հրթիռակոծությանն ականատես չեն եղել։ Դիմացի սարի վրայով անցնող հակառակորդի` ճանապարհի վրա աշխատող մեքենաների լույսերն են ամեն գիշեր տեսնում։ Ասում են՝ դրանից շատ են նեղվում։
ՙԵս մեր տնից ոչ մի տեղ չեմ գնա։ Եթե պետությունը միջոցներ չձեռնարկի ու շինաշխատանքներն ավարտին չհասցնեն՝ ստիպված պիտի մեր միջոցներով շարունակենք։ Ոչ մի իր ու կահույք չենք կարողանում օգտագործել, որովհետև ամբողջը վնասվել է, ստիպված պիտի ամեն ինչ նորից սկսենք՚,-ասում է զրուցակիցս։
Վանյան սկզբից մասնակցում էր Ջաբրայիլի մարտական գործողություններին, հոկտեմբերի 23-ից արդեն գյուղի պաշտպանությունն էին ապահովում՝ ինչպես կարող էին, ինչքան հնարավոր էր։ Այն, որ մինչև վերջ գտնվում էր գյուղում ու ներգրավված էր պաշտպանությանը՝ այդ մասին չեն խոսում, որովհետև այլ կերպ չէր էլ կարող լինել։ Պատերազմական օրերի մասին լռում է, հայացքը թեքում է բազմանշանակ. ո՞վ իմանա՝ ինչե՞ր ունի հոգու մեջ ամփոփած ...
Հիմա Շաքարյան ընտանիքի հայրը շինարարությունում է աշխատում, իսկ տանտիրուհին շարունակում է վերականգնել, կարգի բերել տունը և տնտեսությունը՝ թև ու թիկունք դառնալով ամուսնուն՝ աչքը դիմացի սարին, ականջը միշտ ձենի...