ՀԵՐՈՍՆԵՐԻ ՀԻՇԱՏԱԿԻՆ ՆՎԻՐՎԱԾ ԽԱՉՔԱՐԻ ԲԱՑՈՒՄ ՃԱՐՏԱՐ ՔԱՂԱՔՈՒՄ
Լուսինե ԴԱՇՅԱՆ
Ճարտար քաղաքում խաչքար-հուշակոթող է կանգնեցվել՝ նվիրված երրորդ պատերազմում նահատակված ճարտարցիների հիշատակին։
Խաչքար-հուշակողթողի մտահղացումը կյանքի է կոչվել Ճարտարի զոհված քաջորդիներից` Մարտին Մարտիրոսյանի մի խումբ ընկերների և եղբոր` Միրիկ Մարտիրոսյանի միահամուռ ուժերով:
Հանուն հայրենիքի կյանքը նվիրաբերած Մարտինը սիրում էր հանգստանալ Ճարտարի ՙՄանուն բաղ՚ կոչվող տեղամասում, որտեղ կանգեցվել է խաչքարը:
Նա երազանք ուներ այստեղ համապատասխան պայմաններ ստեղծել, որպեսզի մարդիկ հնարավորություն ունենային մի փոքր կտրվել առօրյա կենցաղից և հանգստանալ բնության գրկում։ Մարտինի երազանքն իրականություն դարձրին ընկերներն ու եղբայրը:
Խաչքար -հուշակոթողի բացման արարողությունը, կազմակերպվեց Ճարտարի Սևակ Ղուկասյանի անվան մարզամշակութային պալատի կողմից, համընկավ նրա ծննդյան օրվան` հուլիսի 2-ին:
ՙՄենք պարտավորություն ունենք այստեղ աղոթակից լինելու, միասնական աղոթքով խաչքար կանգնեցնելու: Պարտավոր ենք` վառ պահելու մեր հերոսների հիշատակը և հաճախակի այցելելու այստեղ` որպես սրբատեղի՚,- նշեց Ճարտարի Ս.Վարդանանց եկեղեցու հոգևոր հովիվ տեր Մխիթար քահանա Հարոյանը, ով կատարեց Խաչքարի օրհնության արարողակարգը:
Խաչքարի բացման պատիվը տրվեց Մարտինի դուստրերին՝ Գայանե և Մանե Մարտիրոսյաններին։
Նրանք նաև մշտադալար եղևնի տնկեցին` հայրենիքի համար կյանքը նվիրաբերած հոր անունով՝ հողին խառնելով մի բուռ կարոտ և համբերություն։
Հոգատարության ու բարության մարմնացում էր Մարտինը,-ասում է կինը՝ Շողերը:
Պատերազմում նահատակված ճարտարցիների հիշատակը հավերժացնող խաչքարի բացմանը խոսք ասացին նաև Մարտինի առաջին ուսուցչուհին` Ն.Գրիգորյանը, նրա ընկերը` Մարտունու շրջվարչակազմի աշխատակազմի ղեկավար Ա.Բաղրյանը
տեր Մխիթար քահանա Հարոյանը։
Արարողությանը ներկա էին նաև Մարտունու շրջվարչակազմի ղեկավար Է.Ավանեսյանը, Ճարտարի քաղաքապետ Վ. Հովհաննիսյանը, շրջվարչակազմի պատասխանատուներ, զոհված զինծառայողների մարտական ընկերներ։