ՀԱՅԵՐԵՆ` ՀՈՎՀԱՆՆԵՍ, ՌՈՒՍԵՐԵՆ` ՎԱՆՅԱ, կամ` ԻՆՉՊԵՍ ՌՈՒՍ ԽԱՂԱՂԱՊԱՀՆԵՐԸ ԾՆՆԴՕԳՆՈՒԹՅՈՒՆ ՑՈՒՑԱԲԵՐԵՑԻՆ ՀԱՅ ԿՆՈՋԸ
Ռուս խաղաղապահ հավաքակազմի Հումանիտար արձագանքման կենտրոնի սպաները և հատուկ նշանակության բժշկական ջոկատի ռազմական բժիշկները հումանիտար-բժշկական ակցիայի շրջանակներում օրերս այցելեցին Մարտակերտի շրջան: Այս անգամ այցը փոքր-ինչ տարբերվեց Արցախում ռուս խաղաղապահների կողմից իրականացվող համանման ակցիաներից:
Բանն այն է, որ հենց այն ժամանակահատվածում, երբ հատուկ նշանակության ջոկատի բժիշկները տեղի բնակչության համար խորհրդատվություն և բուժզննում էին անցկացնում, նրանց զանգեցին Մարտակերտ քաղաքի շրջանային հիվանդանոցից և օգնություն խնդրեցին: Բուժօգնության համար Մարտակերտի շրջանային հիվանդանոց էր դիմել հղի կին` երկունքի ցավերով: Անհրաժեշտ էր իրականացնել Կեսարյան հատում: Դժբախտաբար, հիվանդանոցում համապատասխան մասնագետ չկար, ուստի որոշվեց օգնություն խնդրել Ռուս խաղաղապահ հավաքակազմի գործընկերներից: Մարտակերտի շրջանային հիվանդանոցի մանկաբարձ-գինեկոլոգ Լուսինե Իսկանդարյանի խոսքով` ռուս խաղաղապահները միանգամից արձագանքեցին խնդրանքին և շտապեցին հիվանդանոց: ՙՄենք նեոնատոլոգ չունեինք, բայց, բարեբախտաբար, հատուկ նշանակության բժշկական ջոկատի ռազմական բժիշկների մեջ կար անեսթեզիոլոգ: Նրա օգնությամբ իրականացրինք Կեսարյան հատում: Ամեն ինչ բարեհաջող ավարտվեց: Շնորհակալ ենք Ռուս խաղաղապահ հավաքակազմի մեր գործընկերներին: Նրանց օգնության շնորհիվ ամեն ինչ ժամանակին հասցրինք՚,-ասել է բժիշկը:
Համաձայնեք, որ ռազմական բժիշկների պրակտիկայում ծննդաբերության, հատկապես Կեսարյան հատման դեպքերը հազվադեպ երևույթ են: Դա հաստատեց նաև Ռուս խաղաղապահ հավաքակազմի հատուկ նշանակության բժշկական ջոկատի բժիշկ-անեսթեզիոլոգ Անատոլի Ախապկինը. ՙԲժշկական ջոկատի համար սա ծննդաբերության առաջին դեպքն է, ինչը ռազմական բժշկության մեջ հաճախ չի լինում: Կեսարյան վիրահատությամբ ծնունդը սովորաբար ընդունում է մանկաբույժ-նեոնատոլոգը: Իմ մասնագիտական գործունեությունն սկսել եմ որպես մանկական անեսթեզիոլոգ, աշխատում էի և՜ նորածինների, և՜ փոքր երեխաների հետ: Անհրաժեշտություն կար աշխատելու ոչ միայն որպես անեսթեզիոլոգ, նաև՝ նեոնատոլոգ:
Մայրը նորածին որդուն դեռ վերակենդանացման բաժանմունքում անվանակոչել է Հովհաննես: Երեխան ծնվել է 4 կգ 250գ քաշով, 49սմ հասակով՚:
Ակամայից հիշեցի խորհրդային շրջանի` «Լավ տղաե հին բարի երգը (երաժշտությունը` Ա. Դոլուխանյանի, խոսքը` Լ. Նեկրասովի)` «Լա՜վ տղա, ա՜յ լավ տղա, ի՞նչ է անունդ: Հայերեն` Հովհաննես, ռուսերեն` Վանյաե:
Նշենք, որ տղան ընտանիքի վեցերորդ զավակն է: Ավագ դուստրը 18 տարեկան է, մյուս հինգը որդիներ են: Ռուս խաղաղապահ հավաքակազմի ներկայացուցիչները մորն ու նորածնին տրամադրեցին նվերներ` սավաններ, խաղալիքներ և այլ անհրաժեշտ պարագաներ:
Ընդհանուր առմամբ, ընդունելության ընթացքում հատուկ նշանակության ջոկատի բժիշկները խորհրդատվական և նեղ մասնագիտական բուժօգնություն ցուցաբերեցին Մարտակերտի շրջանի առաջնագծամերձ գյուղերի 52 բնակչի:
Հումանիտար արձագանքման կենտրոնի սպաները մարդասիրական ակցիայի շրջանակներում բազմազավակ ընտանիքներին, հարկադիր տեղահանվածներին և կարիքավոր բնակիչներին տրամադրեցին պարենային փաթեթներ, առաջին անհրաժեշտության իրեր, հագուստ և խաղալիքներ:
ՙԱԱ՚