ԲԱՐԵԿԱՐԳ ԹԱՂԱՄԱ՞Ս ՀԱՎԱՏԱ՞Լ…
ՙԱԱ՚
Մայրաքաղաք Ստեփանակերտի հին թաղամասերից է Կրկժանը։ Թաղամասի հրատապ խնդիրներին ՙԱզատ Արցախ՚-ը ծանոթացել է տեղում։
Երբ արդեն Կրկժանում էինք, բնակիչներն հավաքվել և փորձում էին հնարավորինս համառոտ ներկայացնել այն առաջնահերթ խնդիրները, որոնք խոչընդոտ են հանդիսանում 21-րդ դարում՝ բնականոն և հարմարավետ կյանք վարելու համար։
Բնակիչներից Անուշ Սիմոնյանը, խոսելով թաղամասի փողոցների անմխիթար վիճակից, ասաց.
-Արդեն շուրջ 30 տարի է ապրում եմ այստեղ, և այս տարիների ընթացքում մենք միշտ հույսով սպասել ենք, որ մի օր էլ մեր փողոցները կասֆալտապատվեն, բայց դա այդպես էլ տեղի չունեցավ։ Տեղումների ժամանակ այս ճանապարհներն անանցանելի են դառնում, ցեխի մեջ կորչում է թաղամասը, քայլել չի լինում։ Երեխաները մինչև կանգառ, ամբողջությամբ ցեխոտված են լինում։ Ես ինքս 4 երեխա եմ այս պայմաններում մեծացրել։ Պատկերացնո՞ւմ եք, մի ուրիշ կոշիկով հասնում են կանգառ և այնտեղ փոխում, անտանելի է։ Եթե այս ամենին գումարենք նաև այն, որ թաղամասը կոյուղի չունի, պատկերն ավելի աղետալի է դառնում։ Խնդրում եմ բարձրաձայնեք մեր խնդրի մասին, մենք էլ ենք ցանկանում ապրել բարեկարգ թաղամասում։
Բնակիչներից ոմանք էլ նշեցին, որ հաճախ շտապօգնության մեքենաները դժվարանում են հասնել թաղամասի այս կամ այն հատվածը։ Իսկ տաքսու վարորդներն անձրևներից հետո, առհասարակ, հրաժարվում են պատվեր ընդունել։
Կրկժանում 44-օրյա պատերազմից հետո հաճախ են լսելի կրակոցների ձայներ, թաղամասի բնակիչներն ասում են, որ ինչպես առաջին Արցախյան պատերազմի տարիներին, այնպես էլ հիմա սահմանապահ են, բայց դա նրանց չի խանգարում, պարզապես կամենում են ունենալ բարեկարգ թաղամաս։