ԱՊՐՈՒՄ ԵՆ... ՈՐ ԱՊՐԻ ԳՅՈՒՂԸ
Սիրվարդ ՄԱՐԳԱՐՅԱՆ
Նոր իրողությունները իրենց հետ նոր ապրելակերպ ու կեսակերպ են բերել, իսկ որոշ բնակավայրերի համար աղետալի հետևանքներ ունեցել։ Այսօր գյուղի գլխին, թաղավարդցու տանը նստած թշնամին քանդում, ավերում, թալանում ու սեփականացնում է ոչ միայն նրա` տարիների հալալ քրտինքով ստեղծածը, այլև դա անում է ամենավերջին լկտի հանդգնությամբ։
Թասիբ ու արժանապատվություն ունեցող թաղավարդցին ամեն օր ականատես է, թե թշնամին ինչպես է կտրում իր դարավոր անտառները և ռազմական նշանակության օբյեկտներ կառուցում ու ճանապարհ գցում։ Մի ոտքին տեղ անելով, նա հաջորդ օրն իսկ երկրորդ ոտքի համար է տեղ անում ու այսպես շարունակ, իր համար տեղ բացելով ժամանակի ընթացքում դառնում է ՙպահանջատեր՚` փորձելով ՙապացուցել՚, որ եկվորները հենց բնիկներն են որ կան։
Թաղավարդցին քաջ գիտակցում է, որ իր յուրաքանչյուր հետքայլի փոխարեն, թշնամին գերզարգացած շոշափուկներով, երկրաչափական պրոգրեսիայի հարաճունությամբ զարգանալու հատկություններ է դրսևորում։ Ահա թե ինչու նա քուն ու դադար չունի ու ամեն Աստծո օր իրենից վանելով մահացու հուսահատությունը, փորձում է շյուղ առ շյուղ նորից ու կրկին վերականգնել արկ ու ականի բաժին դարձած իր տունը։Գրեթե մեկուկես տասնամյակ Պաշտպանության բանակում ծառայած, պատերազմական թոհուբոհով անցած, ներկայումս Թաղավարդ-Կալեր համայնքի աշխատակազմի մասնագետ, պահեստազորի փոխգնդապետ Աշոտ Հարությունյանն ու համայնքային խորհրդի անդամ Ռուդիկ Բադասյանը մեզ հետ զրույցի ընթացքում փորձում էին հնարավորինս մանրամասնորեն ներկայացնել գյուղի գլխով անցածն՝ այս վերջին իրադարձությունների ֆոնին։ Գյուղից տեղահանվել է 132 ընտանիք՝ 590 բնակչով: Պահի դրությամբ գյուղում ապրում է 142 ընտանիք՝ 650 բնակչի ընդգրկմամբ։ Վերին Թաղավարդից 86 ընտանիք ժամանակավոր բնակություն է հաստատել Ստեփանակերտում։ Երեք ընտանիք Հադրութի շրջանից, մի ընտանիք Եղեգնաձորի շրջանի Շատին գյուղից է, 5 ընտանիք էլ Վերին Թաղավարդից են իրենց մոտ հաստատվել։ Համայնքի պատասխանատուների հավաստմամբ` գյուղը ծանր օրեր է ապրում, բայց գյուղացիների համար ամեն դժվարություն հաղթահարելի է, նրանք դիմանում են, սակայն խիստ մտահոգված են գյուղի անվտանգությամբ, երեխաների համար են շատ անհանգստանում, նրանք ազատ կյանքի սովոր են, հանդ ու դաշտի սիրահար, հիմա և՜ ծնողները և՜ ուսուցիչները սահմանափակել են նրանց ակտիվ շարժուդարձը։ Դե՜հ, ծնողներին էլ կարելի է հասկանալ, երբ թշնամին եկել չոքել է դռանդ, ինքնապաշտպանական բնազդն իր գրված ու չգրված ՙօրենքներն՚ է թելադրում։ Օրվա բոլոր ժամերին նրանց երբեմնի գյուղական հանդարտ, անխռով իդիլիան խախտվում է թշնամու տարբեր զինատեսակներից արձակվող կրակոցներով։ Թաղավարդում ակտիվ շինարարական աշխատանքներ են ընթանում, սակայն բանվորական ուժի պակաս կա։ Գյուղի բոլոր տների տանիքները վերանորոգման կարիք ունեն, մոտ քսան տանիք արդեն փոխվել է, մի մասի պատուհաններն են փոխել, մի քանի տներում էլ ներքին հարդարման աշխատանքներ են կատարվում։ Հինգ տուն լրիվությամբ մոխիրների է վերածվել, այնպիսի մի տուն չկա, որը վնասված չլինի։ Բոլոր հաշվարկներն արդեն ներկայացված են, և, ինչպես ասվեց, գործն արդեն ընթացքի մեջ է։
Մարտունու շրջվարչակազմի ղեկավար Էդիկ Ավանեսյանը հաճախ է Թաղավարդ գալիս, լինում է մարտական հենակետերում, հանդիպում բնակչության հետ, փորձում նրանց բազում խնդիրներին լուծում գտնել։ Համայնքային խորհրդի պատասխանատուներից տեղեկացանք նաև, որ բոլոր նրանց, ովքեր չունեն տնամերձ հողամաս ու ընտանի կենդանիներ, պարենամթերքի կարիք ունեն, անհրաժեշտ է օգնության ձեռք մեկնել։
Գյուղում երկու խանութ է գործում, բնակչության մի մասն անհրաժեշտ մթերքը բերում է Ստեփանակերտից` չնայած գյուղի խանութներն էլ բնակչության պահանջարկը բավարարում են։
Բուժկետի երկու աշխատողները հոգում են գյուղացիների առողջության հետ կապված խնդիրները, շտապօգնության մեքենա էլ ունեն։ Մշտական գազ ունեն, հոսանքը, թեկուզ խափանումներով, կա, ջրի խնդիր գրեթե չունեն։ Մեր հարցին, թե գյուղացիներն ամենից շատ ինչի կարիք ունեն, համայնքապետարանի պատասխանատուները, խոսքը մեկ արած, ասում են՝ անվտանգության... Գյուղացու ստեղծող, արարող, կոշտուկապատ ձեռքերն աշխատելու ցանկությունից քոր են գալիս, թաղավարդցու համար անխնամ հողակտորը, այգին ու բանջարանոցը պատվի հարց է, նրանց տնամերձը խնամքով ՙսանրված՚ պիտի լինի տարվա բոլոր եղանակներին։ Բոլոր սոցիալ-կենցաղային խնդիրները ժամանակի ընթացքում լուծվելու են, դա գյուղացիներին համարյա չի մտահոգում: Նրանց բոլոր քայլերի ու դրանից ածանցվող ձեռքբերումների հիմքում ընկած է անվտանգությունը։ Վախը սրտում աշխատող մարդուց արդյունք ակնկալելն անիմաստ է, բոլորն էլ կանխատեսելի ապագայի տեսլական ունենալ են ուզում։ Այնպիսի հակառակորդ ունենք, որից խաղաղության երաշխիք ակնկալելը սին հույսեր փայփայել է։ Ու այս հավերժական գոյության պայքարում թաղավարդցին փորձում է կրկին ոտք բռնել ու ճակատի քրտինքը հույսով շաղախելով՝ կարգի է բերում ծերատված գյուղը։
Սահմանամերձ ու, մեղմ ասած, անհանգիստ գյուղում աչքները իշխանավորների ճամփին է, վաղվա օրվա հանդեպ հույս ու հավատ ներշնչողները պատկան կառույցներն են, գյուղացիների հազար ու մի հոգս ու խնդիրներին աջակից ու լծակից, և երբ նրանք ուշանում են, մարդիկ իրենց հոգսերի հետ մենակ մնալով` կուչ են գալիս։ Մեր` լրագրողներիս ներկայությունն էլ որոշակի աշխուժություն մտցրեց գյուղի կյանքում և, փոխանակ մենք շնորհակալ լինենք նրանց` իրենց սահմանապահ առաքելության համար, իրենք հարյուր անգամ մեզ շնորհակալ եղան իրենց դարդուցավով հետաքրքրվելու համար։