ՎԱՐԱԿԻ ԴԵՄ ՊԵՏՔ Է ՊԱՅՔԱՐԵԼ ՀԱՄԱՏԵՂ. ՀԱՄԱՃԱՐԱԿԱԲԱՆԱԿԱՆ ՎԻՃԱԿԸ ԽԻՍՏ ԼԱՐՎԱԾ Է
COVID-19 վարակով պայմանավորված համաճարակային իրավիճակը ՀՀ-ում և ԱՀ-ում շարունակում է մնալ խիստ լարված։
Վերջին շաբաթվա տվյալներով՝ ՀՀ-ում միջինում օրական գրանցվել է նոր կորոնավիրուսի 1184-2354 նոր դեպք, ինչն անցած շաբաթվա համեմատ չի նվազել։ Հոկտեմբերի 29-ի դրությամբ հաստատվել է COVID-19 վարակի 2096 նոր և ընդհանուր 304 546 դեպք։ Վարակից ապաքինվել է 265 936, մահացել՝ 6232 մարդ: Ընդհանուր առմամբ վարակի հայտնաբերման նպատակով կատարվել է 2 066 269 թեստավորում: Վերջին օրվա տվյալներով՝ իրականացվել է 18 141 թեստավորում, ապաքինվել է 1258 հիվանդ, մահացել՝ 43 մարդ։ Կորոնավիրուսային վարակով և այլ հիվանդությունների պատճառով մահվան դեպքերի ընդհանուր թիվը 1288 է: COVID-19 վարակից փաստացի բուժում է ստանում 31 090 հիվանդ։
Արցախում վերջին շաբաթվա ընթացքում միջինում օրական գրանցվել է COVID-19-ի 37-85 նոր դեպք։ Վարակակիրների թիվն անցած շաբաթվա համեմատ կրկին աճել է շուրջ երկու անգամ։ Հոկտեմբերի 28-ին կատարված 175 թեստավորման արդյունքում ԱՀ-ում հայտնաբերվել է կորոնավիրուսային վարակի 85 նոր դեպք։ Ներկայումս Արցախում ստացիոնար բուժում է ստանում 164 վարակակիր. 77 հիվանդի առողջական վիճակը գնահատվում է ծանր, 20-ինը՝ ծայրահեղ ծանր, իսկ թեթև ախտանշաններով վարակակիրներն ամբուլատոր բուժում են ստանում տնային պայմաններում: Հիվանդների մեծ մասը Ստեփանակերտի բնակիչներ (63 հոգի) են։ Մյուս վարակակիրներից 10-ը՝ Մարտակերտի, 7-ը՝ Ասկերանի, 5-ը՝ Մարտունու շրջանների բնակիչներ են:
Ցավոք, արձանագրվել է մահվան 2 դեպք։ Կորոնավիրուսային հիվանդության հետևանքով մահացած 91-ամյա կնոջ մոտ ախտորոշվել էր երկկողմանի պոլիսեգմենտար թոքաբորբ, թոք-սրտային անբավարարություն, իսկ 70-ամյա տղամարդու մոտ ախտորոշվել էր երկկողմանի պոլիսեգմենտար թոքաբորբ, սուր սիրտ-անոթային անբավարարություն: Հոկտեմբեր ասմվա ընթացքում Արցախում թագավարակի հետևանքով մահացել է 8 մարդ, իսկ այս տարվա կտրվածքով՝ 26 վարակակիր։
Համաճարակաբանական վիճակը հանրապետությունում շարունակում է մնալ խիստ լարված։ 2021թ. ընթացքում Արցախում կորոնավիրուսային վարակի հայտնաբերման նպատակով կատարվել է 16 372 հետազոտություն, որի արդյունքում արձանագրվել է COVID-19-ի՝ 1913 դեպք։