ՏԵՂԱՀԱՆՎԱԾ ԸՆՏԱՆԻՔՆԵՐԸ ԳԵՏԱՎԱՆՈՒՄ. ՄԵՂՎԱԲՈՒԾՈՒԹՅՈՒՆԸ ՀԵՌԱՆԿԱՐԱՅԻՆ ՃՅՈՒՂ
Աննա ՊԵՏՐՈՍՅԱՆ
Մարտակերտի շրջանի Գետավանի համայնքում 49 տեղահանված բնակիչ է հաստատվել։ Մեզ հետ զրույցում համայնքի ղեկավար Արարատ Զախարյանը մանրամասնեց, որ նրանք մասամբ բնակվում են բարեկամների կամ գյուղացիների տներում։ Տեղահանվածների մի մասն արդեն ապահովվել է աշխատանքով։
Գետավանի դպրոցում, հիվանդանոցում ու ՙԱռաքել՚ ՍՊԸ-ում առկա աշխատատեղերից բացի, վերջին 5 տարիներին գյուղացիների հիմնական եկամտի աղբյուր է նաև մեղվաբուծությունը։ Գյուղացիները սեփական միջոցներով մեղվաընտանիքների թիվն ընդհանուր առմամբ արդեն հասցրել են 500-ի։ Համայնքապետի հաղորդմամբ՝ նախորդ տարիների համեմատ այս տարի ստացված մեղրի ցուցանիշը նվազել է, քանի որ անցած տարի գյուղացիները չեն կարողացել զբաղվել մեղուների խնամքով։
Համայնքապետի խոսքով` մեղվաբուծությունը, որպես եկամտի աղբյուր, հեռանկարային է գետավանցիների համար։ Պետական աջակցության դեպքում անասնապահությունն ու մեղվաբուծությունը նաև տեղահանվածների զբաղվածության ապահովման հնարավորություն կընձեռեն։
Գետավանում տեղահանվածների, բազմազավակների և աճող ընտանիքների համար ներկայում տներ են կառուցվում։ Վերանորգման կարիք ունի պատերազմի հետևանքով վնասված 6 տուն։
Ավելի քան 370 բնակիչ ունեցող գյուղում գործում է միջնակարգ դպրոց՝ 80 աշակերտով։ Այստեղ մանկապատեզի անհրաժեշտություն է զգացվում. 47 նախադպրոցական ունեն։ Համայնքապետարանին կից են գործում մշակույթի տունը և տեղամասային հիվանդանոցը։
Համայնքապետն, անդրադառնալով խնդիրներին, տեղեկացրեց, որ չգազաֆիկացված այս գյուղում հաճախ են էլեկտրամատակարարման խնդիրներ առաջանում՝ պայմանավորված էլեկտրալարերի վիճակով։ Ճանապարհները մասամբ ասֆալտապատ են։
Ինչպես 44-օրյա պատերազմի ընթացքում, այնպես էլ հետո՝ Գետավանից ոչ ոք չի հեռացել։ Համայնքապետի բնորոշմամբ՝ գետավանցին ուժեղ կամք ունեցող, հպարտ ու հայրենի հողի համար անձնազոհ տեսակ է։