ՄԵՐ ՊԱՏՄՈՒԹՅԱՆ ԱՆՏԻՊ ԷՋԵՐԸ
...Բազումք են կոչեցեալք,
և սակաւք ընտրեալք...
ԱՍՏՎԱԾԱՇՈՒՆՉ
Արարատից Արագած, Արագածից Արամազդ, Արամազդից Մռով, Մռովից Քիրս... Լեռնագնացի համար այն կարող է սովորական լեռնաշղթա թվալ, որ կհաղթահարի մեկ կամ առնվազն երկու գիշերվա քայլարշավով, բայց կա՜ց... Այդ լեռնաշղթան մեզ հիշեցնում է հայոց պատմության հաղթանակների շարասյունը, նոր նվաճումների շղթան՝ հաջորդը նախորդին կիպ-կպած, բարձագնա՝ ինչպես հայոց լեռները։ Այս լեռնաշղթան մեզ տանում է հայոց պատմության վերելքներով ու խոր անկումներով, զարգացման հակասական, անկանոն բնույթով ու խորդուբորդ ճանապարհներով։ Այս լեռներից՝ մեր կողքին, ապագայի հետ խոսում են մեր ֆիդայիներն ու հայորդիները:
1992թ. մայիսյանը բոցավառվեց որպես հույսի մի ճրագ, որպես գոյատևման ու ազգապահպանման մի խարիսխ։ Աստեղային ժամեր կարելի է անվանել այսօրինակ փրկության պահերը։ Հայոց պատմության աստեղայի՜ն ժամեր։
Արցախյան շարժում, գոյամարտ, գոյապայքար, ազատամարտ, ինչպես ուզում եք կոչեք։ Այս բառակապակցություններից ցանկացածը հպարտության, միասնության, հաղթության զգացումով է պարուրում մեր հոգին՝ անկախ նրանից մենք ականատեսն ենք եղել Գոյամարտի, թե՝ ոչ։
Մանկությանս մայիսներն անցել են մեր մեծերի հաղթանակների վերհուշով, Եռատոնի ցնծությամբ, երբ մենք զգացել ենք մեզ հաղթանակած առավել, քան երբևէ։ Հիշում եմ, թե ինչպես էին ամեն տարի մայիսի 9-ին երկու պապիկ շտապում հուշակոթող՝ ծաղիկներ խոնարհելու։ Հիշում եմ. այդ պապիկներից մեկը՝ Բենիկ անունով, մեզ պատմել էր, թե ինչպես է կռվել ֆիննական պատերազմում, իսկ մյուսը մեզ ցույց է տվել Բեռլին տանող ճանապարհը։ Խորեն պապիկն էր Բեռլին հասածը, սակայն դա նրա համար այլևս փուչ բան էր։ Նա արդեն, երբ գրիչը ձեռքն էր առնում, փառաբանում էր որդու կյանքի գնով բերված հաղթանակը։
«Ցավն ուժեղինն է և ցավը սիրում է, որ իրեն զգում են»,- ասում էր Խորեն պապիկը և արտասանում Ղարաբաղին ձոնած իր բանաստեղծություններից։
Նույն այդ սերնդի որդիները՝ մեր հայրերը, մեզ պատմել են, թե ինչպես է մի փոքրիկ Ղարաբաղ` ժայռեր ճեղքելով բարձրացել Շուշի, հասել Մարտակերտ, ազատագրել Ակնան, Շահումյանը և մագլցել Գոմշասարի բարձունքը: Մեր սերնդի մանկության մայիսները լցված են այն սևազգեստ կնոջ բաժանած քաղցրավենիքի անուշ բույրով, ում անգամ մի կարգին էլ ծանոթ չէինք։ Ամեն տարի մեծերն էին ճանաչել տալիս. «Սերժիկի մայրն է, Սերժիկի անունից քաղցրավենիք է բաժանում»։ (Երևի այդ կնոջ քարին էլ է հիմա գրված «Որդիս կգա»)։
Իսկ տատս, հիշում եմ, միշտ մի Արտիկ անունով ազատամարտիկի մասին էր պատմում, ով չհանձնելով խրամատը, իր վերջին կռիվը քարերով է մղել և ընկել քաջի մահով։ Դա Սասնա Մհերի ծուռ ոգին էր, որ դուրս էր եկել հանուն ազնիվ պայքարի։
Այսօր, այդ վերհուշերով մեծացած սերունդը, ձեզ հիշում է խոր ակնածանքով և պահում իր սրտում։ Ձեր սերունդը եղավ Աստծո կողմից ընտրված, իսկ մենք արժանի կլինե՞նք ձեր հետնորդը կոչվելուն, չգիտեմ, թող գնահատեն պատմությունն ու ժամանակը։ Հիմա՝ Գինի լից...
Շնորհավո՛ր Եռատոն։
Նանիկ ԱՂԱՍՅԱՆ