ՀՀ «ԱՍՏՂԻԿ» ԲԿ-Ի ՆԵՈՆԱՏՈԼՈԳԻ ԽՈՐՀՈՒՐԴՆԵՐԸ
Ծննդյան առաջին իսկ օրվանից տարվող ճիշտ խնամքը երեխայի առողջության կարևոր նախապայման
ԱՀ առողջապահության նախարարության, Հայ օգնության ֆոնդի (ՀՕՖ), «Առաջադեմ բժշկություն» ՀԿ-ի հետ համատեղ իրականացվող «Բժիշկներ Արցախի համար» ծրագրի շրջանակներում մայիսի 23-ից մինչև հունիսի 3-ը Ստեփանակերտի Մոր և մանկան առողջության պահպանման կենտրոնի նեոնատոլոգիայի բաժանմունքում խորհրդատվություններ և զննումներ իրականացրեց ՀՀ «Աստղիկ» բժշկական կենտրոնի ծննդատան նեոնատոլոգ Կոնստանտին ՔՐՄՈՅԱՆԸ: Ներկայացնում ենք նրա հետ ունեցած մեր հարցազրույցը։
- «Բժիշկներ Արցախի համար» ծրագրի շրջանակներում արդեն երկրորդ անգամ Ստեփանակերտի ծննդատան նեոնատոլոգիայի բաժանմունքում զննել եք առողջ և հիվանդ նորածիններին, տվել համապատասխան ցուցումներ ծննդկան մայրերին՝ երեխաների կերակրման, լոգանքի, զբոսնելու և խնամքի հետ կապված այլ հարցերի վերաբերյալ, որոնք անչափ կարևոր են երեխայի առողջության համար:
-Նորածինների առողջ զարգացման համար կարևոր նշանակություն ունի ծննդյան առաջին իսկ օրվանից նրանց նկատմամբ տարվող խնամքը։ Երեխայի ծնվելուց առաջին վեց ժամվա ընթացքում չի կարելի նրան լողացնել, քանի որ նորածնի մաշկն ունի պաշտպանիչ շերտ, իսկ լողացնելու դեպքում պաշտպանիչ ճարպը վերանում է։ Խնամքի հետ կապված պարտադիր խորհուրդ ենք տալիս մայրիկներին, որ չօգտագործեն օճառներ, փոշեցան (տՐՌրօտՍՈ), անտիսեպտիկ նյութեր, հատկապես երեխայի պորտը խնամելու ժամանակ։ Ներկա դրությամբ այլևս չենք սպասում, որ նորածնի պորտը չորանա, հետո դուրս գրվի ծննդատնից, այլ պորտալարի մնացորդով էլ ուղարկում ենք տուն՝ խորհուրդ տալով ամեն օր փոքրիկին լողացնել։ Պորտալարի մնացորդը սովորաբար ընկնում է 5-15-րդ օրը։ Անհրաժեշտ է նորածնի պորտը մաքրել միայն 70%-անոց սպիրտով և ոչ մի այլ անտիսեպտիկ նյութ չօգտագործել։ Նորածինների լոգանքի դեպքում պարտադիր պետք է օգտագործել նրանց համար նախատեսված լոգանքի կոսմետիկ հատուկ հեղուկ նյութեր, քսուքներ, որոնք թույլատրվում են երեխայի ծննդյան առաջին իսկ օրվանից։ Դրանք մարմինը խոնավեցնող նյութեր են, որոնք պաշտպանում են նաև նորածնի մաշկը և կանխում բորբոքումները։ Իսկ մաշկը երեխայի օրգանիզմի կարևոր պաշպանիչ գործոնն է, որ պահում է տարբեր վարակներից։ Հիվանդ մաշկի դեպքում բոլոր վարակները կարող են ներթափանցել օրգանիզմ և դառնալ բորբոքային տարբեր հիվանդությունների պատճառ։ Լոգանքը միջինում տևում է 10 րոպե, ընդ որում՝ ջրի ջերմաստիճանը պետք է լինի 37-38, իսկ սենյակինը՝ 26-27 աստիճան։
-Նորածինների խնամքին վերաբերող այդ բոլոր կարևոր մանրամասներին տեղյա՞կ են նորաթուխ մայրերը, որովհետև տարիներ առաջ բոլորովին այլ էին փոքրիկներին խնամելու մեթոդները։ Նախկինում ընդունված էր նորածիններին բարուրել, կերակրել հատուկ ժամային ռեժիմով, լոգանքի ժամանակ ջրի մեջ լցնել կալիումի պերմանգանատ (մարգանցովկա) և խնամքի հետ կապված այլ ձևեր, որոնք ներկայումս ընդունելի չեն։
-Ծննդատնից դուրս գրելու ժամանակ մեր ծննդկաններին տրամադրում ենք տեղեկատվական թերթիկներ, որտեղ նշված են խնամքի հետ կապված կարևոր մանրամասները։ Այո, այժմ այլ չափանիշներ են ընդունվել։ Առողջապահության համաշխարհային կազմակերպության կողմից խորհուրդ է տրվում նորածիններին կերակրել ազատ ժամանակացույցով, այսինքն առանց ժամային սահմանափակման՝ ելնելով նրանց պահանջներից։ Ընդհանրապես առողջ նորածնի կրծքով սնուցումը կարող է տևել 40 րոպե՝ 1-3 ժամը մեկ։ Երեխային պետք է կերակրել հանգիստ և մտերմիկ միջավայրում։ Խորհուրդ է տրվում կյանքի առաջին 6 ամիսների ընթացքում կրծքի կաթից բացի երեխային ոչինչ չտալ։ Ինչ վերաբերում է երեխայի բարուրելուն, այժմ ընդհանրապես խորհուրդ չի տրվում նորածնին բարուրել, քանի որ դա սահմանափակում է մանկան շարժունակությունը։ Իսկ մեզ անհրաժեշտ է, որ նորածինն աշխույժ լինի, ավելի հաճախակի կերակրվի, որպեսզի չունենա քաշի կորստի հետ կապված խնդիրներ։ Ինչքան հաճախ նա կրծքով կերակրվի, այնքան կխթանվի մոր կաթնարտադրությունը։ Ու բարուրված երեխային կերակրելու համար շատ ավելի դժվար է կցել մոր կրծքին, քան ազատ հագցված շորերով։ Կրծքով կերակրվող առողջ փոքրիկը համարյա միշտ էլ մոր գրկում է լինում, իսկ քնելու ժամանակ հիգիենայի նկատառումներից ելնելով պետք է նորածնին դնել իր անկողնում։
-Երեխայի կյանքում կարևոր տեղ է զբաղեցնում զբոսանքը։ Նորածինների դեպքում ե՞րբ և ինչքա՞ն ժամանակ պետք է տրամադրել զբոսնելուն։
-Զբոսանքը խորհուրդ ենք տալիս նորածինների ծննդատնից դուրս գրման հաջորդ օրվանից, հատկապես ամառային այս օրերին՝ առավոտյան 11։00-12։00-ն։ Սկզբից այն կարող է տևել մինչև կես ժամ, այնուհետև աստիճանաբար կարելի է որոշակիորեն երկարեցնել զբոսնելու ժամանակը։ Ցավոք, մեր բնակչության շրջանում նորածիններին զբոսանքի տանելու հետ կապված ավելորդ զգուշավորություն են պահում, հատկապես երեխայի ծննդյան քառասնօրյա ժամանակահատվածում։ Սակայն հնարավոր վտանգները կարելի է նվազեցնել` սահմանափակելով զուտ երեխայի շփումը այլոց հետ, բայց մաքուր օդում զբոսնելը պարտադիր է նորածնի առողջության համար։
- Նորածնային շրջանում երեխայի մաշկը երբեմն կարող է չորանալ և նկատվել ատոպիկ դերմատիտ (մաշկաբորբ), ալերգիկ այլ երևույթներ։ Այդ խնդիրն ի ծնե՞ է, թե՞ սխալ խնամքի հետևանք։
-Ատոպիկ դերմատիտները ծնողներից երեխային չեն փոխանցվում։ Դրանք առաջանում են մաշկի ոչ ճիշտ խնամքի պատճառով, երբ հատկապես լոգանքի ջրի մեջ ավելացնում են անտիսեպտիկ նյութեր, կալիումի պերմանգանատ (մարգանցովկա), տարբեր տեսակի խոտեր, օճառներ։ Մաշկի չորությունից առաջանում են միկրոճաքեր, որոնց միջոցով վարակներ են ներթափանցում՝ առաջացնելով կարմրություն, բորբոքում և ալերգիկ այլ երևույթներ։ Ուստի պետք է չթողնել, որ մաշկը ճաքճքի։ Փառք Աստծո, այժմ նորածինների համար կան լոգանքի կոսմետիկ հատուկ հեղուկ նյութեր, քսուքներ, որոնք թույլատրվում են օգտագործել երեխայի ծննդյան առաջին իսկ օրվանից և ունեն ապացուցված արդյունավետություն։ Դրանք մարմինը խոնավեցնում են ու պաշտպանում նորածնի մաշկը դերմատիտներից, մաշկային բորբոքումներից։ Ատոպիկ դերմատիտները ժառանգական հիվանդություններ չեն, այլ զուտ մաշկի սխալ խնամքի հետևանք։ Հնարավոր է նաև նորածինների մոտ առաջանան տակդիրային դերմատիտներ, և լինում են դեպքեր, երբ տակդիրը փոխելով հարցը լուծվում է։
-Ե՞րբ պետք է անհանգստանալ նորածնի առողջության համար։
-Եթե նորածինն ունի թուլություն, գույնի փոփոխություն, գրգռվածություն, շնչառական խանգարումներ, մարմնի ջերմաստիճանի բարձրացում կամ իջեցում, կրկնվող փսխումներ, փորլուծություններ, լավ չի սնվում, ապա այդ և այլ վտանգավոր երևույթների դեպքում անհապաղ պետք է դիմել բժշկի։
Եթե նորածինն ակտիվ է, կերակրվում է կրծքով, քաշի ավելացումը բավարար է, փսխում չունի, ուրեմն առողջ է։ Շատ մեծ նշանակություն ունի նորածնի քաշի դինամիկան, հատկապես կյանքի առաջին մեկ ամսվա ընթացքում։ Առողջապահության համաշխարհային կազմակերպությունը նորածնի քաշի ավելացման նորման միջինում համարում է 300-600 գրամը։
Զարինե ՄԱՅԻԼՅԱՆ