ԵՐԱԶԱՆՔՆԵՐԻՑ ՉՈՒՇԱՑՈՂ ԽԱՉԵՆԸ
Մարտակերտի շրջանի մի շարք գյուղերում ծանրաբեռնված աշխատելուց հետո իրիկնաժամին շարժվեցինք դեպի մայրաքաղաք Ստեփանակերտ։ Մեզ ուղեկցում էր մայր մտնող արևին ընկերակցող թեթև, գրեթե աննկատ անձրևը։ Հասել էինք Ասկերանի շրջանի Խաչեն գյուղ, և որոշեցինք ծանոթանալ խաչենցիների առօրյային։
Նոր էինք մայրուղուց թեքվել, երբ հանդիպեցինք մի խումբ երեխաների: Նրանցից յուրաքանչյուրը մեզ համոզում էր կանգ առնել Խաչենի միջնակարգ դպրոցի բակում, որտեղ, չնայած օրվա այդ ժամին դասեր չէին անցկացվում, բավականին մարդաշատ էր։
Թեև Ղազարոս Աղայանի անունը կրող դպրոցը փակ էր, մեզ հաջողվեց երեխաներից իմանալ, որ կրթօջախում գործում է թանգարան, որտեղ խաչենցի երկու մեծերի՝ Սերգեյ Սարինյանի և Սևակ Արզումանյանի անցած ճանապարհն ու կենսագրությունն է ամբողջացված։
Գրականագետ-քննադատ, բանասիրական գիտությունների դոկտոր-պրոֆեսոր, ՀՀ ԳԱԱ ակադեմիկոս Սերգեյ Սարինյանը խաչենցիների հպարտությունն է, մեզ հանդիպած փոքրիկներն անգամ հաճույքով պատմում էին նրա մասին, և բոլորն, առանց բացառության, իրենց խոսքն ավարտում այսպես.
-Սարինյանը մեր շինացեյա, գիդո՞ւմք, չէ՞։
Ու հետաքրքիրը հարցադրումը չէր, հետաքրքիրը նրանց` մեզ սաստող հայացքներն էին։ Հանկարծ մեզնից մեկը համարձակվեր ու ասեր, որ չի ճանաչում...
Քանի որ Խաչենը մեզ դիմավորեց Սարինյանով, պարտավոր էի մի փոքր անդրադառնալ Սարինյան երևույթին։
Գրականագետ Սերգեյ Սարինյանի աշխատությունները նվիրված են հայ նոր գրականության պատմության, գրական ուղղությունների, գրականագիտության մեթոդաբանության ու տեսության հարցերին։ Նրա գրչին են պատկանում հայ դասականների մասին մենագրություններ ու հոդվածներ։ Իր ուսումնասիրություններում Սերգեյ Սարինյանը հետազոտել է 19-րդ դարի և 20-րդ դարի սկզբի հայ գրականության պատմության պարբերացման, զարգացման օրինաչափությունների, գրական դպրոցների և դասական գրողների ստեղծագործության գիտական մեկնաբանության սկզբունքները։ Նրան բնորոշ է գրական երևույթների կոնկրետ պատմական ու տիպաբանական, գեղագիտական ու փիլիսոփայական համարժեքների միասնական քննությունը։ Սերգեյ Սարինյանը հանդես է եկել նաև ժամանակակից հայ գրականության հրատապ խնդիրներին նվիրված քննադատական աշխատություններով։
Անշուշտ, հպարտանալու պատճառ ունեն խաչենցի փոքրիկները։
Մեր հաջորդ կանգառը գյուղամիջում էր, որտեղ խաչենցի Անուշը զգուշորեն մշակում էր ժենգյալով հացի համար նախատեսված կանաչիները։ Մեզ նոր էին նկատել, երբ գյուղացիներից մեկն ասաց.
-Անուշ, հանեք եկալըն է, դե պատասխաննեն կտաս։ Էտքան ժենգալ օնի՞ս:
Անուշը կոլորիտային Խաչենի յուրահատկությունը մեզ փոխանցեց հենց առաջին խոսքից.
- Շինացեն պարտավորա ուրան վըղումը բանջար մշակե, ես էլ հատե իմ մշակած բանջարաս ժենգյալավ հացու մաչում պատրաստում, շենին ժենգյալավ հացը օրիշա, քըղըքեցուն թխածը կարել չի ստի ինի, թա հվատում չըք, կացեք վեր թխիմ կոտիք, կհամոզվիք։
Անուշի խոսքը հաստատում էին ժենգյալով հացի համտեսմանը սպասող համագյուղացիները և Անուշին օգնող Թավրիզ տատը։
Ի դեպ, Թավրիզ տատի հետ էլ զրուցեցինք, նա մեզ մի հազար անգամ այդ ընթացքում օրհնել էր։ Նրան անկեղծորեն գրկեցինք բոլորս, ինքնաբերաբար ստացվեց։
Հետո ցանկանում էինք շարժվել դեպի գյուղի հուշահամալիր, երբ մեզ ճանապարհին հուշեցին կանգ առնել 44-օրյա պատերազմից հետո Խաչենում բնակություն հաստատած Ծատրյանների օջախում։
Տարեց ամուսինները՝ Յուրա և Սուսաննա Ծատրյանները, մեզ ընդունեցին սիրով, տիկին Սուսաննան համբուրեց մեր ճակատը, ասաց.
- Պարավըք եկալ, ես ծեզ մատաղ։
Ծատրյանների տան բակում անկեղծ էր զրույցը։ Առաջինը խոսեց տանտիկինը` հայացքով նախ համաձայնություն ստանալով ամուսնուց։
«Տուն ու տեղ ենք կորցրել` տարիների մեր ամբողջ ունեցվածքը թողնելով թշնամուն, բայց, ինչպես ասում են, Աստված կամեցավ, որ մենք այս պատկառելի տարիքում դեռ ապրենք, ինչ ասեմ, ճակատագրից փախչել հնարավոր չէ։ Խաչենցիները մեզ շատ լավ են ընդունել, խոսք չկա։ Հարևաններն ամեն ինչ անում են, որ մենք մեզ լավ զգանք, ես երախտապարտ եմ»,- ձայնի դողը մի կերպ զսպելով ասաց տիկին Սուսաննան։
Իսկ պարոն Յուրին շարունակեց.
- Ճիշտ է, ամեն բան թողել ենք թշնամուն, բայց այդ չէ ցավը։ Ես այս տարիքում էլ ամեն ինչ նորից կստեղծեմ: Ամեն ինչ։ Իմ ցավը մեր տղերքն են, մեր ջահելները, որ զարկվեցին ...
Հետո շարունակել չկարողացավ, արցունքներն սկսեցին խեղդել Յուրի պապիկին։
Մի քանի րոպե լուռ բոլորս իրար էինք նայում, երբ պարոն Յուրին վեր կացավ տեղից ու սկսեց նորից խոսել.
-Պետք է չկոտրվենք, պետք է ապրենք և էլ ավելի շատ աշխատենք, որ կարողանանք և՛ ոտքի կանգնել, և՛ կորցրածը ետ բերել։ Մենք այլ տարբերակ չունենք։
Ծատրյան ընտանիքը հետպատերազմյան Արցախի դիմագիծը շեշտող երևույթներից մեկն էր: Նրանց հետ ունեցած մեր զրույցի բովանդակությունը, բնականաբար, մի հոդվածով հաղորդելու բան չէ, բայց զգացածով ապրելը երևի հազարամյակների բաժին է։
Ծատրյանների տան բակում հավաքված խաչենցիները մեզ ուղեկցեցին գյուղի եկեղեցի։ Իսկ եկեղեցու մոտ հավաքված երեխաները շատ-շա՜տ էին։
Պարզվում է, հավաքվել են մեզ դիմավորելու, մեզ հետ ծանոթանալու։
Երեխաներից մեկը մոտեցավ մեզ ու ասաց, որ երեք դհոլահարներով ցանկանում են մի ստեղծագործություն նվագել։
Երեքով նստեցին եկեղեցու բակում և զարկեցին։
Ու մենք շշուկով բոլորս միաձայն սկսեցինք արտասանել.
-Պարեց Սասունն ու ողջ աշխարհը հիացավ...
Խաչենի մասին վերջաբան չեմ ուզում գրել, չեմ ուզում, որովհետև հաստատ էլի շատ բաների մասին պիտի գրեի, բայց անկարող եղա, անկարող եղա, որովհետև նույնիսկ հիմա, օրեր հետո, Խաչենի ու խաչենցիների մասին գրելիս, զգացմունքներն սկսեցին խժռել ինձ։
Երանի՜ նրանց, ովքեր խաչենցիների պես գիտեն ապրելու բանաձևը։
Սերգեյ ՍԱՖԱՐՅԱՆ