ՏԵՂԵԿԱՏՎԱԿԱՆ ՏԵԽՆՈԼՈԳԻԱՆԵՐԻ ՈԼՈՐՏԻ ԱՋԱԿՑՈՒԹՅԱՆ ԾՐԱԳՐԵՐՆ ԱՐՑԱԽՈՒՄ
Արցախում տեղեկատվական տեխնոլոգիաների ոլորտի զարգացման նպատակով իրականացվում է «ՏՏ ոլորտի պետական աջակցության» ծրագիրը, որը միտված է զբաղվածության տեսակարար կշռի ապահովմանը, արտադրանքի և ծառայությունների ծավալի տարածքային համաչափ աճին, արցախյան հատվածի առավելությունների և հնարավորությունների մասին իրազեկվածության և ներկայացվածության աստիճանի բարձրացմանը։
Այս մասին մեզ հետ զրույցում ասաց Արցախի Հանրապետության տարածքային կառավարման և ենթակառուցվածքների փոխնախարար Սմբատ Պետրոսյանը։ Ծրագրով ակնկալվում է Արցախի շրջաններում ավելացնել ՏՏ ոլորտում զբաղված անձանց թիվը՝ նվազագույնը հասցնելով 30-ի, ինչպես նաև բացառել համապատասխան արտադրանքի և ծառայությունների ծավալի նվազումը, ապահովել ոլորտի մասնագիտություններով վերաորակավորման ծրագրերին տարեկան կտրվածքով առնվազն 600 դիմողի մասնակցություն։
Մեր զրուցակցի խոսքով՝ ծրագրի իրականացման սկզբունքներն են՝ պետական միջոցների նվազագույն ներգրավվածությամբ մասնավոր հատվածի հետ սերտ համագործակցությունը, մրցակցային և հավասար հնարավորությունների ապահովումը, տարածքային համաչափ զարգացումը, մարդկային կապիտալի զարգացման գերակայությունը, արդյունքների չափելիությունը, սեփական արտադրական կարողությունների զարգացման գերակայությունը և ֆինանսական պատասխանատվությունը ծրագրի բոլոր մասնակիցների համար։
«Ծրագրի շրջանակներում աջակցություն է իրականացվում մասնագիտական որակավորման ու վերաորակավորման, հեռավար աշխատանքի գրասենյակային կենտրոնների հիմնման, ՏՏ ոլորտի հանրայնացման, գիտություն, տեխնոլոգիա, ճարտարագիտություն, մաթեմատիկա (ԳՏՃՄ) առարկաների ուսուցման խրախուսման համար։ Նշեմ, որ մասնագիտական որակավորման, վերաորակավորման աջակցության միջոցառման շրջանակներում ներգրավվելու են Արցախի շրջաններում (բացի մայրաքաղաք Ստեփանակերտից) ՏՏ մասնագիտություններով վարձու աշխատանք առաջարկողների կամ տաղանդների հավաքագրմամբ և կառավարմամբ զբաղվող մասնագիտական կազմակերպությունները, ինչպես նաև այդ մասնագիտություններով վարձու աշխատանք փնտրողները, մասնագիտական որակավորման կամ վերաորակավորման կրթական ծրագրերի դիմողները, մասնագիտական որակավորման կամ վերաորակավորման կրթական ծրագրեր իրականացնողները, հեռավար աշխատանքի գրասենյակային կենտրոնները և ԱՀ տարածքային կառավարման և ենթակառուցվածքների նախարարությունը։ Հեռավար աշխատանքի գրասենյակային կենտրոնների հիմնման շրջանակներում նախատեսվում է առնվազն մեկական կենտրոն ստեղծել Արցախի Հանրապետության Ասկերանի, Մարտունու և Մարտակերտի շրջաններում»,-մանրամասնեց մեր զրուցակիցը՝ ավելացնելով, որ գիտություն, տեխնոլոգիա, ճարտարագիտություն, մաթեմատիկա առարկաների ուսուցման խրախուսման նպատակով նախատեսվում է աջակցել Արցախում բնագիտական առարկաների դպրոցական օլիմպիադաների հաղթողներին։ Կխրախուսվեն ճանաչողական այցելությունները (էքսկուրսիաներ), թեմատիկ ճամբարները, ինչպես նաև համայնքների դպրոցների «Արմաթ» ինժեներական լաբորատորիաների առաջխաղացումը։
Ս. Պետրոսյանի հաղորդմամբ՝ ոլորտի հանրայնացման աջակցության միջոցառման շրջանակներում պետական աջակցության մասին իրազեկվածության բարձրացման, գովազդման, հանրության առավել լայն շրջանակների միջև կապերի ամրապնդման, ինչպես նաև թվային գրագիտության բարձրացման նպատակով նախատեսվում է Արցախում նշված ոլորտին առնչվող միջոցառումներին (ցուցահանդեսներ, կոնֆերանսներ, մրցույթներ, աշխատանքային տոնավաճառներ) կազմակերպչական և ֆինանսական աջակցության ցուցաբերում, տվյալ բնագավառին և թվային տնտեսությանը վերաբերող ուսումնական նյութերի և տեսահոլովակների պատրաստում ու տեղական հեռուստաալիքով հեռարձակում, ինչպես նաև սոցիալական մեդիա հարթակներում տարածում, Արցախում ոլորտի պետական աջակցության վերաբերյալ մարքեթինգային նյութերի պատրաստում։
Տեղեկատվական տեխնոլոգիաների ոլորտի զարգացման հիմնախնդիրներից առանձնացնեմ ոլորտի մասնագետների անբավարար թիվը, վերապատրաստման և վերաորակավորման կայուն գործընթացի բացակայությունը, ոլորտի վերաբերյալ հանրության անբավարար իրազեկվածությունը և աղավաղված ընկալումները, մասնագիտական կողմնորոշման և վերակողմնորոշման արդյունավետ միջոցների բացակայությունը, էլեկտրամատակարարման, էլեկտրոնային և տրանսպորտային հաղորդակցության ենթակառուցվածքների անհուսալի աշխատանքը կամ անկատարությունը, ՏՏ ոլորտի մասնավոր հատվածի և կրթական համակարգի թերի կապերը, ձեռնարկատիրական գործունեությանը խթանող միջավայրի բացակայությունը,- տեղեկացրեց Ս. Պետրոսյանը։
Մեր զրուցակցի հաղորդմամբ՝ Արցախում գործում է տեղեկատվական տեխնոլոգիաների ոլորտի 8 ընկերություն, որոնց աշխատողների ընդհանուր թիվը կազմում է 90 հոգի, իսկ գրանցված 2 ընկերություն ժամանակավորապես դադարեցրել են իրենց գործունեությունը՝ պատվերների բացակայության պատճառով։ Այդ ընկերությունները հիմնականում զբաղվում են ծրագրային ապահովման մշակմամբ (վեբ ծրագրերի մշակում, մոդելավորում, սպասարկում, մոբայլ ծրագրավորում, մոբայլ հավելվածների մշակում, անալիտիկ (վերլուծական) ծրագրերի պատրաստում։ Ոլորտի 2 ընկերություն 2021 թվականի տարեսկզբից 6 ամիս ժամկետով 100 դիմորդի հետ անց են կացրել դասընթացներ՝ ոլորտում նոր մասնագետների պատրաստման նպատակով, որոնցից միայն 20 հոգի են աշխատանքի ընդունվել։ Այս ընկերությունները վերապատրաստման դասընթացներ են կազմակերպում նաև աշխատակիցների համար։ Պատվերների գերակշիռ մասը ընկերություններն ստանում են արտասահմանից և Հայաստանի Հանրապետությունից։
Փոխնախարարի խոսքով՝ ԱՀ ՏԿԵՆ գործունեության շրջանակներում իրականացվում է նաև «Հայքն Աշխարհին» ծրագիրը՝ միտված Արցախում թվային մասնագիտությունների ուսուցմանը և 10 ոլորտի թվային մասնագետների պատրաստմանը։ Ծրագրին գրանցվել է 627 մասնակից, որոնցից 315-ը որոշել է շարունակել և հանձնել է մեկնարկային ուսումնական գործընթացի թեստը։ Նրանցից 199 մասնակից հաղթահարել է թեստերով սահմանված շեմը՝ ճիշտ պատասխանելով հարցերի 50%-ին։
Աննա ԱԼԵՔՍԱՆՅԱՆ