ՀԱՄԱԿԱՐԳՎԱԾ ՊԱՅՔԱՐԸ ԿՏԱ ԻՐ ԱՐԴՅՈՒՆՔԸ
Հարցազրույց ԱՀ գլխավոր դատախազ Գուրգեն ՆԵՐՍԻՍՅԱՆԻ հետ
- Պարոն Ներսիսյան, գաղտնիք չէ, որ թմրամոլությունը և դրանց ապօրինի շրջանառությունը գերխնդիր են դարձել աշխարհի մեծ ու փոքր պետությունների համար: Ինչպիսի՞ն է Արցախում վիճակագրությունը։
-Պատերազմը դաժան երևույթ է ոչ միայն այն պատճառով, որ մարդկային կյանքեր է խլում, ավերածություններ առաջացնում, այն նաև նպաստավոր պայմաններ է ստեղծում տարատեսակ հանցավոր երևույթների ձևավորման ու զարգացման համար: Այս առումով Արցախին պատուհասած 44-օրյա պատերազմը բացառություն չէր. ռազմական գործողությունների օրերին արձանագրվեցին գողության, գույքի ոչնչացման կամ վնասման բազմաթիվ դեպքեր, իսկ հետպատերազմյան շրջանում սկսեցին իրենց զգացնել տալ այնպիսի հանցավոր երևույթներ, ինչպիսիք են զենքի ու զինամթերքի, թմրամիջոցների ապօրինի շրջանառության դեպքերը:
2021թ. Արցախում արձանագրվել էր թմրամիջոցների ապօրինի շրջանառության 100 դեպք (2020թ.` 48), որից 70-ը ոչ իրացման նպատակով (2020թ.՝ 34-ը), իսկ 11-ը` իրացման նպատակ հետապնդող դեպքեր էին (2020թ.՝ 2-ը): Նույն տարում արձանագրվել էր շրջանառությունն արգելված՝ թմրամիջոց հանդիսացող բույսերի ցանման կամ աճեցման 18 դեպք (2020թ.` 6): Նշված վիճակագրական տվյալները վկայում են, որ 2021թ. ցուցանիշներն ավելի քան կրկնակի անգամ գերազանցել են նախորդ տարվան։ Սա բացատրվում է հետևյալ կերպ. 44-օրյա պատերազմին անմիջապես հաջորդած տարվան իրավապահ համակարգը հանցավորության դեմ պայքարի գործին դեռևս չէր հասցրել ներգրավել իր ողջ ներուժը:
Թմրամիջոցների ապօրինի շրջանառության դեպքերի վերաբերյալ վիճակագրական նույն պատկերը շարունակում է պահպանվել նաև 2022 թվականի ընթացքում. ոստիկանությունը պարբերաբար բացահայտում է տարբեր՝ այդ թվում խոշոր և առանձնապես խոշոր չափերով թմրամիջոցների ձեռքբերման, պահման ու իրացման դեպքեր: Պետք է ընդգծել, որ այս խմբին պատկանող հանցագործությունների թվի աճը պայմանավորված է նաև թմրամիջոցների վաճառքի եղանակների արդիականացմամբ: 2021 թվականից սկսած բացահայտվել են մի շարք այնպիսի դեպքեր, երբ տվյալ պահին թմրամիջոցի ծագման աղբյուրը մնացել էր անհայտ. դրանք այն դեպքերն են, երբ վաճառքը կատարվել էր կապի ժամանակակից միջոցների օգտագործմամբ, ինչը հնարավորություն է ընձեռել թմրամիջոցն իրացնողին մնալ չբացահայտված, իսկ գումարի փոխանցումը կատարվել էր տերմինալների միջոցով: Բարեբախտաբար, հայաստանյան մեր գործընկերները որոշակի հաջողություն են գրանցել նման եղանակով թմրամիջոցի իրացմամբ զբաղվող անձանց բացահայտման գործում, որը թույլ կտա նվազեցնել դրանց ձեռքբերման հնարավորությունը նաև Արցախում:
- Ունե՞ք թմրամոլության դեմ պայքարի համակարգային ծրագիր: Մեկ գերատեսչության ուժերով թերևս հնարավոր չէ պայքար տանել…
- ԱՀ Նախագահի մոտ իրավապահ մարմինների ղեկավար կազմի մասնակցությամբ տեղի ունեցած վերջին խորհրդակցության ժամանակ քննարկված թեմաներից մեկն էլ նվիրված էր հենց այդ խնդրին: Իրականում թմրամոլությունը հիվանդություն է, որով տառապող անձը մեծ վտանգ է ներկայացնում ոչ միայն իր, այլև ուրիշների կյանքի ու առողջության համար: Հետևաբար, նման անձանց բուժելը պետք է լինի առողջապահության ոլորտում պետության գերակա խնդիրներից մեկը: Թեև Արցախում գործող հոգեթմրաբանական դիսպանսերի մասնագիտական և նյութատեխնիկական ներուժը թույլ է տալիս իրականացնել թմրամոլությամբ տառապող անձանց բուժումը, այդուհանդերձ, շատ քիչ թիվ են կազմում այն անձինք, ովքեր կամավոր դիմում են այդ բուժհաստատություն: Թմրամիջոցների ապօրինի շրջանառության դեպքերի կապակցությամբ հարուցված քրեական գործերով նախաքննական մարմնի կողմից մշտապես նշանակվում են փորձաքննություններ, և եթե փորձագետի կողմից եզրակացություն է տրվում այն մասին, որ մեղադրյալն ունի նաև թմրամոլությունից հարկադիր բուժման կարիք, ապա նման դեպքերում դատարանի կողմից պատժի հետ համատեղ նշանակվում է նաև բժշկական բնույթի հարկադրանքի միջոց: Ստացվում է, որ թմրամոլությունից բուժվելու հիմնական ճանապարհը հարկադիր բուժումն է, ինչը չի կարող բավարար համարվել… Պարզ է, որ պետության միջոցները չեն կարող բավարարել բոլոր թմրամոլներին բացահայտելու և նրանց նկատմամբ հարկադիր բուժում նշանակելու համար: Դրա համար անհրաժեշտ է ձևավորել այնպիսի մթնոլորտ և համընդհանուր բնույթ կրող ու ընդունելի այնպիսի միջավայր, որտեղ թմրամոլությամբ տառապող անձի համար բժշկի դիմելը և բուժում ստանալը չի ենթարկվի տարբեր մեկնաբանությունների, չի արժանանա բարոյական կամ այլ բնույթի քննադատությունների:
Թմրամոլության և թմրանյութերի ապօրինի շրջանառության դեմ պայքարի տարբեր ծրագրեր կան, սակայն դրանք անհրաժեշտ չափով փոխկապակցված չեն, այդ պատճառով ԱՀ Նախագահի կողմից տրվել էր հանձնարարական՝ առաջիկայում ձևավորելու և կառավարության հաստատմանը ներկայացնելու համապատասխան միջոցառումների ծրագիրն ու այն իրագործելու ժամանակացույցը: Վստահ եմ՝ ծրագիրը կյանքի կոչելու դեպքում առաջին իսկ տարում վիճակագրական պատկերում կունենանք ակնհայտ դրական փոփոխություններ:
- Իսկ այդ ծրագրում ո՞րն է ԱՀ առողջապահության նախարարության դերը՝ թմրամոլության դեմ պայքարում:
- Առողջապահության նախարարության առաջնային դերը այդ հիվանդության բուժումը կազմակերպելն է՝ բուժհիմնարկների միջոցով, սակայն թմրամոլության դեմ պայքարի միջոցառումների ծրագիրը հաստատվելու դեպքում նախարարությունը պետք է ներգրավվի նաև բացատրական ու քարոզչական այդ մեծ աշխատանքի կազմակերպմանը: Իրականում այդ գործընթացի արդյունավետությունն ուղղակիորեն խարսխված է բացատրական, պարզաբանական աշխատանքների վրա, և որքան մեծ լինի տեղեկատվության հանրային ընդգրկվածությունը, այնքան ավելի մեծ արդյունք կունենանք:
- Ընտանիքի, դպրոցի դերը՝ թմրամոլության դեմ պայքարի գործում. այս առումով, արդյոք, գոյություն ունի՞ համակարգված պայքար…
- Կարծում եմ, կհամաձայնեք, եթե ասեմ, որ արցախցիներս պատրաստ ենք ամեն ինչի պատասխանատվությունը դնել պետության վրա և ամեն մի բացասական երևույթի պատասխանը պահանջել պետությունից: Իհարկե, պետությունն ունի բազմաթիվ պարտականություններ, սակայն սա չի նշանակում, որ պետությանը պետք է թողնել միայնակ՝ բոլոր տեսակի խնդիրների հետ. մեզնից յուրաքանչյուրը կարող է և պետք է իր մասնակցությունն ունենա հատկապես այնպիսի աշխատանքներում, որոնց արդյունքի սպառողը ոչ թե անձն է, այլ հանրությունը, հանրային լայն շրջանակը: Թմրամոլության դեմ պայքարը հենց նշածս դեպքերից է, և այս գործում անելիք ունեն թե՛ ընտանիքն ու դպրոցը և թե՛ բարձրագույն ուսումնական հաստատություններն ու աշխատանքային կոլեկտիվները: Կարծում եմ՝ միջոցառումների ծրագրում ներառված կլինեն փոխկապակցված և փոխլրացնող այնպիսի աշխատանքներ, որոնցում ներգրավված կլինեն թվարկածս ոլորտները:
- Պարոն Ներսիսյան, այսօրվա դրությամբ որքա՞ն է Արցախում գրանցված թմրամոլների թիվը և քանի՞սն են կանայք: Ի դեպ՝ ՄԱԿ-ի փորձագետները թմրամոլ կանանց թվի աճ են կանխատեսում…
- ԱՀ առողջապահության նախարարության «Հոգեթմրաբանական դիսպանսեր» ՓԲԸ-ում հաշվառված թմրամոլների թիվը չի գերազանցում 10-ը, և նրանց թվում կին չկա: Կարծում եմ, այս վիճակագրությունը ևս փաստում է, թե որքան անմխիթար վիճակ ունենք այդ առումով և որքան մեծ է մեր անելիքը: Ես ամենևին նպատակ չունեմ վախ կամ մտահոգություն առաջացնել, և բնավորությամբ հակված եմ ցանկացած երևույթ ընդունել այնպես, ինչպես կա իրականում և դրան համարժեք աշխատանք կատարել: Թմրամիջոցների ապօրինի շրջանառության բացահայտված դեպքերը փաստում են, որ թմրամոլության մակարդակը բավականին հեռու է համապատասխան բուժհիմնարկում արձանագրված վիճակագրությունից, ինչը մեզ պարտավորեցնում է համընդհանուր ջանքերով վերհանել այդ հիվանդությամբ տառապող անձանց և հասնել նրանց լիակատար բուժմանը: Այդպես մենք կունենանք ավելի առողջ հասարակություն, որից շահում են բոլորը՝ առանց բացառության:
Հարցազրույցը վարեց
Լաուրա ԳՐԻԳՈՐՅԱՆԸ