ՀԱՆՐԱՊԵՏՈՒԹՅՈՒՆՈՒՄ ՇԱՐՈՒՆԱԿՎԵԼՈՒ ԵՆ ՀԱՏՈՒԿ ՄԻՋՈՑԱՌՈՒՄՆԵՐԸ
Հարցազրույց Արցախի Հանրապետության ՆԳՆ ոստիկանության ճանապարհային ոստիկանության պետի տեղակալ Արմեն Օհանյանի հետ
-Վերջին շրջանում Հանրապետությունում աճել է տրանսպորտային փոխադրամիջոցների թիվը։ Այդ հանգամանքը ի՞նչ բաժին է կազմում պատահարների, երթևեկության կանոնների խախտման ցուցանիշներում։
-Հետպատերազմյան ժամանակաշրջանում Արցախի Հանրապետությունում երթևեկությունը դարձել է գերծանրաբեռնված, հատկապես մայրաքաղաքում, ինչը պայմանավորված է 2020թ. պատերազմի հետևանքով տեղահանված մեր հայրենակիցների Ստեփանակերտ քաղաքում բնակություն հաստատելու հետ։ Աճել է ոչ միայն տրանսպորտային միջոցների, այլ նաև վարչական իրավախախտումների թիվը։ Նշեմ, որ 2022թ. առաջին եռամսյակի ընթացքում հանրապետություն է ներմուծվել՝ 646, իսկ 2021թ. առաջին եռամսյակում՝ 1332 տրանսպորտային միջոց։
-Ընթացիկ տարում Հանրապետությունում քանի՞ ճանապարհատրանսպորտային պատահար է գրանցվել։ Նախորդ տարվա նույն ժամանակահատվածի համեմատ ի՞նչ է ցույց տալիս վիճակագրությունը:
-Ընթացիկ տարում ի հայտ է բերվել ճանապարհային երթևեկության կանոնների խախտման 11 հազար 598, իսկ 2021թ. նույն ժամանակահատվածում գրանցվել է 8 հազ. 711 դեպք։ Ինչպես տեսնում եք՝ ունենք վարչական իրավախախտումների մեծ աճ։ Ճանապարհատրանսպորտային պատահարների վիճակագրությունը ցույց է տալիս, որ 2021թ. 5 ամիսների ընթացքում մահվան ելքով և մարմնական վնասվածքով գրանցվել է 39 ճանապարհատրանսպորտային պատահար, որի հետևանքով մահացել է 8 և մարմնական վնասվածք ստացել 40 քաղաքացի։ Ընթացիկ տարվա նույն ժամանակահատվածում գրանցվել է 28 ճանապարհատրանսպորտային պատահար, որի արդյունքում 38 քաղաքացի ստացել է տարբեր աստիճանի մարմնական վնասվածք։ Հանրապետության շրջաններում տեղի ունեցած պատահարները և դրանց հետևանքով կրած վնասները եթե համեմատենք նախորդ տարվա վիճակագրության հետ, կարող ենք ասել, որ 2022թ. ունենք նվազում և՛ ճանապարհատրանսպորտային պատահարաների, և՛ մահացածների ու մարմնական վնասվածք ստացածների քանակով։ Նյութական վնասով ճանապարհատրանսպորտային պատահարների վիճակագրությունը հետևյալն է. 2021թ. 5 ամիսների ընթացքում գրանցվել է 404 նյութական վնասով ճանապարհատրանսպորտային պատահար, իսկ 2022թ. նույն ժամանակահատվածում ՝405։
-Ի՞նչ միջոցներ են ձեռնարկվում նման դեպքերը նվազագույնի հասցնելու համար։
- Ճանապարհային ոստիկանության յուրաքանչյուր օրվա ծառայությունը միտված է ճանապարհատրանսպորտային պատահարների կանխարգելմանը, վարչական իրավախախտումների նախականխմանն ու բացահայտմանը։ Յուրաքանչյուր օր, յուրաքանչյուր ժամանակաշրջան, կարծես, իր պահանջներն է դնում ճանապարհային ոստիկանության առաջ՝ կատարելով ժամանակին համահունչ կանխարգելիչ միջոցառումներ։ Հաշվի առնելով վերջին շրջանում հրազենի գործադրմամբ կատարված հանցագործությունների և իրավախախտումների թվի աճը, ինչպես նաև քաղաքացիների սահմանադրական իրավունքները, հասարակական կարգն ու անվտանգությունն ապահովելու նպատակով, վերջերս ԱՀ Նախագահի կողմից Անվտանգության խորհրդի նիստում տրված հանձնարարություններով, ՆԳ նախարարի կարգադրություններով և ԱՀ ոստիկանության պետի հրամանով, Հանրապետության ամբողջ տարածքում կազմակերպվել և իրականացվել են հատուկ միջոցառումներ։ Մայիսի 17-ից մինչև հունիսի 17-ն ընկած ժամանակահատվածում իրականացված հատուկ միջոցառումներին ընդգրկված էին Ճանապարհային ոստիկանության, տարածքային ստորաբաժանումների ծառայողներ ու ԱՀ ԱԱԾ աշխատակիցներ։
-Ամփոփվե՞լ են արդյունքները։ Հանրապետությունում շարունակվելո՞ւ են հատուկ միջոցառումները։
-Իրականացված հատուկ միջոցառումներն իրենց դրական ազդեցությունն ունեցան ինչպես ճանապարհային երթևեկության ոլորտում հանցագործությունների բացահայտման, այնպես էլ վարչական իրավախախտումների նախականխման ուղղությամբ։ Ոստիկանության պետի հրամանով օրերս իրականցվել է խստացված ռեժիմով ծառայություն, առաջիկայում նման միջոցառում կկազմակերպվի նաև շրջաններում։ Մայիսի 17-ից մեկ ամիս ժամկետով ԱՀ-ում իրականացված հատուկ միջոցառումների ընթացքում ի հայտ են բերվել ճանապարհային երթևեկության կանոնների խախտման 899 դեպք. անսթափ վիճակում տրանսպորտային միջոց վարելու 76 դեպք, տրանսպորտային միջոց վարելու իրավունք չունեցող անձանց կողմից տրանսպորտային միջոցներ վարելու 129 դեպք, կեղծված հաշվառման համարանիշներով տրանսպորտային միջոցներ վարելու 1 դեպք, այլ խախտումների՝ 693 դեպք։ Ճանապարհային ոստիկանության հատուկ պահպանվող տարածքներ են տեղափոխվել 157 տրանսպորտային միջոց։ Հայտնաբերված դեպքերի համապատասխան իրավական ընթացքավորմամբ պարզվել է, որ իրավախախտումներից 83-ի արարքում առկա է հանցակազմ՝ նախատեսված ԼՂՀ քրեական օրենսգրքով։
-Ծանր հետևանքներով վթարները տեղի են ունենում հատկապես մայրուղիներում։ Ինչո՞վ է դա պայմանավորված։ Ի՞նչ միջոցառումներ են ձեռնարկվում։
-Ճանապարհատրանսպորտային պատահարների առաջացման պատճառներ են հանդիսանում ոչ միայն կոպիտ խախտումները, այլ նաև՝ նվազ նշանակության իրավախախատումները։ Հիմնականում ճանապարհատրանսպորտային պատահարներն առաջանում են հարթավայրային ավելի արագընթաց ճանապարհահատվածներում։ Դրանք բացառելու համար ճանապարհային ոստիկանության առաջարկով քաղաքաշինության նախարարության հետ համատեղ հանրապետության որոշ ճանապարհահատվածներում, օրինակ՝ Ստեփանակերտ-Ասկերան արագընթաց ճանապարհահատվածում, նախատեսվել և իրագործվել է երթևեկության արագության սահմանափակում։ Արագության սահմանափակումը նախատեսվել է նաև Ստեփանակերտ-Այգեստան –Վանք ճանապարհահատվածում։
-Վերջին շրջանում հաճախակի ենք ականատես լինում հետիոտների վրաերթերի։ Այս ուղղությումբ ի՞նչ միջոցառումներ են իրականացվում։
-Ստեփանակերտ քաղաքում ճանապարհատրանսպորտային պատահարների մեծ թիվ են կազմում հետիոտների վրաերթ բնութագրմամբ։ 2022թ. 5 ամիսներին գրանցվել է հետիոտնի վրաերթի բնութագրման 7 ճանապարհատրասնպորտային պատահար, որոնց հետևանքով 7 քաղաքացի ստացել են տարբեր աստիճանի մարմնական վնասվածքներ։ Դրանք նվազագույնի հասցնելու կամ բացառելու ուղղությամբ ճանապարհային ոստիկանության, Ստեփանակերտի քաղաքապետարանի և ԱՀ քաղաքաշինության նախարարության համատեղ ուժերով կազմակերպվել են հետազոտություններ և ճանապարհային ոստիկանությունը հանդես է եկել իր առաջարկությամբ՝ մայրաքաղաքի վթարավտանգ հատվածներում, արագընթաց ճանապարհահատվածներում տեղադրելու արհեստական անհարթություններ։ Այս պահի դրությամբ մայրաքաղաքի փողոցների մեծ մասում կատարվել են այդ աշխատանքները, մինչև տարեվերջ կավարտվեն նախատեսված բոլոր աշխատանքները։ Հետիոտների վրաերթերը բացառելու համար, ինչպես ուսումնական տարվա ընթացքում, այնպես էլ հանգստյան օրերին, ոչ միայն ճանապարհային ոստիկանության, այլ նաև Ստեփանակերտ քաղաքի վարչության և ոստիկանության տարբեր ստորաբաժանումների ծառայողների հետ համատեղ, կազմակերպվում է ուժեղացված ծառայություն։
-Վերջերս մայրաքաղաքի փողոցներում 200 տեսախցիկ է տեղադրվել։ Երթևեկության կանոնների խախտման դեպքում տեսախցիկներով արձանագրություն կազմվո՞ւմ է, վարչական տույժ նշանակվո՞ւմ է։
-Մայրաքաղաքում տեղադրված տեսախցիկների օգնությամբ արձանագրվում են ճանապարհային երթևեկության բնագավառում վարորդների թույլ տված իրավախախտումները, ինչպես նաև հասարակական կարգը։ Իրավախախտման դեպքում համապատասխան ընթացքավորմամբ վարորդը ենթարկվում է վարչական պատասխանատվության։ 2022թ. առաջին եռամսյակի ընթացքում Ստեփանակերտի քաղաքային վարչության տեսադիտարկման խմբի կողմից ստացել ենք ճանապարհային երթևեկության կանոնների խախտման 214 հաղորդում։ Իրավախախտում թույլ տված վարորդների նկատմամբ կայացվել է որոշում՝ վարչական պատասխանատվության ենթարկելու վերաբերյալ։
Անի ՄԱՆԳԱՍԱՐՅԱՆ