ԿՅԱՆՔԵՐ՝ ՀԵՏԱԴԱՐՁ ՇՐՋԱՊՏՈՒՅՏՈՒՄ
Ուղիղ երկու տարի առաջ Լարիսա Ստեփանյանի Տող-Կարմիր շուկա-Սարգսաշեն-Ակնաղբյուր պատերազմական տխուր ճամփորդությունն ավարտվել է Ստեփանակերտում։
2020թ. նոյեմբերի 23-ին Տողի բնակիչներից վերջինն է հեռացել գյուղից ու մինչև այժմ ապրում է մայրաքաղաքի կենտրոնական հատվածում՝ Վազգեն Սարգսյան փողոցում գտնվող հինգհարկանի շենքի կիսանկուղային հարկի կիսամութ սենյակներից մեկում։ Առնետներից ազատվելու համար կատվի ձագուկ էր գտել, ընտելացրել, այժմ հիմնական զրուցակիցը Մկո անունով արդեն մեծացած այդ կատուն է։ Մեկ նեղլիկ սենյակ ու քայլաչափ նախասենյակ, մի կերպ փակվող պատուհան, սենյակի սառն ու ծանր օդը հազիվ կոտրող, սեփական միջոցներով գնված մեկ տաքացուցիչ, խոնավությունից սևացած առաստաղ ու նվազագույն կենցաղն ապահովելու համար երկու տարվա մեջ այստեղից-այնտեղից ձեռքբերված ու սենյակում մեկ քայլ ազատ տեղ չթողած կահ-կարասի. այդպիսին է Արցախյան առաջին պատերազմում որդուն ու եղբորը կորցրած Լարիսայի ապրելակերպը։ Լիովին դատարկված ու արդեն գրավված գյուղից դուրս գալը, գյուղից գյուղ տեղափոխվելն ու ամբողջ պատերազմի ընթացքում անծանոթ շենքերի նկուղներում պատսպարվելու ու Ստեփանակերտից հեռու չգնալու որոշումն անխախտ է պահել օր առաջ հարազատ գյուղ վերադառանալու հույսը, որն այսօր էլ չի մարել։ Նրա հետ նույն տարածքում՝ միջանցքի աջուձախ կողմերում, ապրում ու մեկ ընդհանուր սանհանգույցից օգտվում է ևս երեք ընտանիք, չորրորդը վերջերս է այլ տուն տեղափոխվել։ Մարտունու շրջանի Ջիվանի ու Թաղավարդ, Հադրութի շրջանի Տող ու Թաղոտ գյուղերում էին ապրում նրանք։ Չորս ընտանիքների զբաղեցրած «բնակտարածքը» մասնավոր սեփականություն է, նախկինում այն ծառայում էր որպես ՆԳՆ պոլիկլինիկայի բաժանմունք։ Տարածքը գազաֆիկացված չէ, տաք ջուր միայն երկար միջանցքի ծայրի ընդհանուր լոգարանում կարելի է գտնել։ Քանի որ սենյակները շատ են փոքր, երեխաներով ընտանիքներին նաև որպես խոհանոց ծառայող մեկ՝ ավելի փոքր սենյակ են հատկացրել։ Ըստ կենվորների՝ նախկինում պետությունն էր տարածքի սեփականատիրոջը վճարում, հավանաբար այն որպես հյուրատուն էր գրանցված, հետո, երբ տեղահանվածների համար սկսել է գործել 40 հազարների ծրագիրը, տանտիրոջ առաջարկությամբ ամեն անձի համար ամսական 30 հազար դրամ են սկսել վճարել։
Տարեց ամուսիններ Մելսիկ և Անահիտ Աստոյանները վրացահայեր են, 1999թ. Ջիվանիում էին վերահաստատվել, տուն կառուցել, մեծ ընտանիք դարձել, երկու որդի և երկու դուստր են մեծացրել։ Որդիներից մեկը տեղափոխվել էր ՌԴ, պատերազմի ընթացքում, տիկին Աննայի պատմելով, շատ էր ուզում հասնել հայրենիք, սակայն համավարակի պատճառով չի հաջողվել։ Ամուսինը տաս տարի առաջ է առաջին ինսուլտը տարել, սակայն գյուղում ինքնուրույն քայլում էր, անգամ թեթև աշխատանքներ էր անում։ Պատերազմի օրերին երկրորդ կաթվածը գամեց անկողնուն։ Ինքը՝ տիկին Անահիտը, վերջերս է ողնաշարի վիրահատություն տարել։ Արդեն դժվարությամբ է քայլում, երկար կանգնել չի կարողանում։ Սոցիալական զարգացման և միգրացիայի նախարարություն մի քանի անգամ գնալուց հետո սայլակ են ստացել, սակայն Մելսիկ պապի վիճակն արդեն գրեթե թույլ չի տալիս այն օգտագործել, պետության օգնությունը սրանով ավարտվել է։ Կարմիր խաչի օգնությամբ էլ լվացքի մեքենա են գնել։ Ստեփանակերտում ապրող դուստրն է հիվանդ ծնողների միակ խնամակալն ու օգնողը։ Թվում է, պետությունը պետք է հաշմանդամ դարձած տեղահանվածի խնամողին նաև վճարի, սակայն ո՞ւր է թե. այստեղ խոնավ սենյակում անկողնուն գամված տեղահանվածն է մոռացության մատնված։
Սկզբում շատ էին դիմում տեղահանվածների հարցերով զբաղվող բոլոր կառույցներին։ Մի տեղ հուսադրում էին, մի տեղ կոպիտ մատնացույց անում ավելի կարիքավորներին։ Համակերպվել ու այդպես ապրում են։ Ապրում են Գլխավոր դատախազությունից մի քանի քայլ վերև, այն կառույցից, որը Տեղահանվածների հարցերով հանձնաժողով էր ստեղծել ու լրատվամիջոցների ներկայությամբ ստուգումներ էր կազմակերպել մայրաքաղաքի՝ տեղահանվածներ պահող այլ հյուրանոցներում ու հյուրատներում։ Մի քանի քայլի վրա է նաև ՄԻՊ գրասենյակը։ Կենվորների խոսքով, օրերս գրասենյակի երկու աշխատակից, թերևս աշխատանքից տուն գնալիս, մտել են իրենց մոտ, ծանոթացել իրենց խնդիրներին, ցավել, որ նման պայմաններում են ապրում, խոստացել համապատասխան կառույցներին դիմել։
Թաղավարդից տեղահանված Արմինե Համզոյանը ամուսնու և երեք երեխաների հետ համեմատաբար մեծ սենյակն են զբաղեցնում, որը և՛ ննջարան է, և՛ խոհանոց, և՛ հյուրասենյակ։
Երեխաներից մեկը զարգացման ու աճի հետ կապված խնդիրներ ունի, պարբերաբար Երևան՝ հետազոտման են տանում։ Ընտանիքը զրկված է 40-հազարական աջակցության ծրագրից, քանի որ Թաղավարդի մեր հսկողության տակ մնացած տարածքում տուն ունեն և փախստական չեն համարվում։
Նելսոնի խոսքով՝ իրենց տունը համարյա հարյուր տարեկան պապական տուն է, բացի այդ, հրետակոծվել ու պիտանի չէ բնակության համար, իսկ վերանորոգումն ուշանում է։ Վերանորոգումից հետո էլ համոզված չէ, որ կվերադառնա։ Շինարարությունում է աշխատում, փայտ է բերում մոտ անտառներից ու վաճառում, մի կերպ 120 հազար դրամ կազմող տան վարձն է տալիս, սննդի հոգսը հոգում։ Հադրութի Թաղոտից տեղահանված Աննա Սարգսյանը երկու երեխաների հետ ևս սենյակներից մեկում է ապրում, փոքրը դեռ երկու տարեկան չկա, սեփական միջոցներով լվացքի մեքենա է ձեռքբերել, պետության տվածը փոքրիկ սառնարանն ու ծալովի մեկ մահճակալն է։ Երիտասարդ կինը դժգոհ է սենյակների համար ըստ շնչի վճարելուց, պետության տված գումարը միայն դրան է հերիքում։ Երբեմն շենքի բնակիչներն են օգնում հագուստով ու սննդով, երբեմն որևէ բարեգործական կազմակերպության օգնության մասին է պատահաբար տեղեկանում ու խնդրում, որ իրեն էլ օգնեն։
Պատերազմից հետո տեղահանվածների հոսքը Ստեփանակերտում բնակարանային խնդիրն անասելի սրացրել է, սա փաստ է, որը շատ ենք սիրում կրկնել բոլորս։ Շատ ենք սիրում նաև կրկնել, որ պատերազմից հետո բոլորով ենք հայտնվել ցավի, կորստի, զրկանքի, կենցաղային անհարմարությունների չավարտվող իրականության մեջ։ Երբ այդ ամենը լիուլի ճաշակած տեղահանվածներն են սկսում բողոքել հյուրատների պայմաններից, տանտերերի նշանակած վարձավճարներից, միշտ ուշացող ու անբավարար աջակցությունից, նեղսրտում ենք, սկսում մեղադրել նրանց անհարկի պահանջկոտության, թունոտ պահվածքի, հարազատ եզերքը կորցնելու մեջ անխտիր բոլորին՝ միայն ոչ իրենց մեղադրելու մեջ։
Վ. Սարգսյան 11 հասցեում արդեն ավելի քան երկու տարի պատսպարված այս ընտանիքների հյուրընկալ բարությունը, հավատով սպասումն ու ճակատագրի շարունակվող հարվածների հանդեպ համբերությունը, որոնք ոչ մի կերպ չեն տեղավորվում այդ բնակտարածքի մռայլ սյուրռեալիստական պատկերների կողքին, ամաչեցնող են։
Հետպատերազմյան տարիների ընթացքում բազմաթիվ տեղահանվածների սրտառուչ ու ցավալի պատմություններ շատ էի լսել, սակայն տողեցի տիկին Լարիսայի պատմածի կսկիծը մի կողմ է հրում ամեն ինչ՝ հարազատ եզերքի կորստի անձնական ցավ, կսկծացնող հիշողությունները։ Երբ գործի էր գցել տասնամյակների հնություն ունեցող իր մեքենան (շրջանում գրեթե միակ կին վարորդն էր) ու դուրս էր գալիս գյուղից, վերջին շնչավորները, որոնց տեսավ հարազատ գյուղում, գյուղամիջում, փոստի մոտ խմբված թշնամու զինվորներն էին, դրոշ էլ կար ձեռքներին։ Աչքերին չէր հավատում, վախ էլ չէր զգում, միայն, ղեկը թողած, ակնապիշ նրանց էր նայում։ Չկանգնեցրին (հետո իմացավ, որ նույն օրը երկու տարեց տղամարդու դաժանաբար սպանել էին գյուղում), հակառակը՝ ասել են քշի գնա, բաջի։ Ու հետո, ամբողջ ճանապարհին մտածում էր, որ աչքին են երևացել... Հետո, երբ ուշքն ու միտքը հետադարձ շրջապտույտների մեջ արդեն չէին ենթարկվում, մտածում էր, ինչո՞ւ դուրս եկավ տնից...
Նունե ՀԱՅՐԱՊԵՏՅԱՆ