ՏՈՀՄԱԾԱՌՆ ԱՄՈՒՐ Է ԱՐՄԱՏՆԵՐՈՎ...
Արցախում հայտնի Կիսիբեկյանների բազմանդամ գերդաստանը ապրում էր բարեկեցիկ կյանքով՝ ղեկավարվելով դարերով սրբագործված նահապետական օրենքներով։ Կիսիբեկյան գերդաստանի մասին շրջապատում ասվում էր. «Վարանդու քլիդ Գիսիբեկ»։ Եվ, հիրավի, Սխտորաշենի շրջակայքում տոհմի ազգանվեր բարեգործությունների քարեղեն վկայությունները պահպանվում էին մինչև վերջերս։ Աբրահամ Կիսիբեկյանը 40 տարի նվիրվել է մատաղ սերնդի կրթության ու դաստիարակության գործին։ Նա ժամանակին Լեռնային Ղարաբաղի կրթական, մշակութային, դաստիարակչական, հասարակական ու քաղաքական կյանքում իր ներդրումն ու գործուն մասնակցությունն է ունեցել։
Կիսիբեկյան պատվարժան տոհմի ներկայացուցիչներից մեկն էլ Գրիգորի Կիսիբեկյանն էր, որի օջախում վերջերս հյուրընկալվելով հիացմունքի ու հպարտության բազմաթիվ առիթներ ունեցանք...Ցավոք, Գրիգորիին այդպես էլ հանդիպելու առիթ չենք ունենա, նա վախճանվել է 2020 թվականի հոկտեմբերի 29-ին, սակայն իր օջախում, հարազատների խոսք ու զրույցում նա մշտապես ներկա է, ներկա՝ ընտանիքի անդամներից յուրաքանչյուրի հիշողության մեջ։ Իր անվերջ ներկայությամբ նա շարունակում է տան գլխավորի, առաջնորդի իր դերակատարությունը։ Նրա ապրած կյանքը ուղենիշ է ոչ միայն զավակների համար, նա բարեկամական, ընկերական շրջապատում էլ մնաց անգերազանցելի։ Նրա նվիրվածության, հայրենապաշտության մասին կարելի է անվերջ խոսել ու չսպառել թեման... Խորհրդային բանակի՝ Ստեփանակերտում տեղակայված զորամասերից մեկում էր ծառայում Գրիգորի Կիսիբեկյանը, երբ սկսվեց Ղարաբաղյան շարժումն ու կարճ ժամանակ անց վերաճեց զինված հակամարտության։ Աֆղանական պատերազմի բովում թրծված զինվորականն իր փորձ ու գիտելիքներով քիչ է ասել օգտակար եղավ նորաստեղծ Պաշտպանության բանակին։ Մեծ է նրա ներդրումը, հատկապես ուսումնական զորամասի կազմավորման գործում, վերջին ծառայության վայրը «Եղնիկներ»-ում էր, որտեղից էլ 1999թ. մայիսի 9-ին զորացրվել է։
Կինը՝ Զոյա Կիսիբեկյանը, մանկավարժի գործը թողած միացավ ընտանիքի անդամներին. կին թե տղամարդ տանը բոլորը ծառայության մեջ էին։ 91-ին Շուշիից սկսեցին «Ալազաններով» հրթիռակոծել Ստեփանակերտը, քաղաքի բոլոր մանկապարտեզները փակվեցին, Զ. Կիսիբեկյանն էլ շատերի պես մնաց առանց աշխատանքի։Ավագ որդին՝ Հակոբը, Պաշտպանության բանակում ծառայել է 24 տարի։ Ասում են, երբ պատերազմի ժամանակ սակրավորի կարիք էր լինում, բարձրաստիճան հրամանատարը Հակոբին էր պահանջում ուղարկել։ Մարտագործողությունների ողջ ընթացքում նա միայն երկու օրով տուն եկավ՝ մասնակցելու մորաքրոջ նահատակ որդու հուղարկավորությանն ու հոր թաղմանը։ Զինվորական թոշակառուն ներկայումս պայմանագրային հիմունքներով ծառայում է Արտակարգ իրավիճակների պետական ծառայությունում։ Միջնեկը՝ Ռաֆայելը, զորակոչվել է 1998 թվականին ու առայսօր ծառայում է առանձին վերանորոգման-վերականգնողական զորամասում։ Գրեթե երկուսուկես տասնամյակ ծառայության մեջ գտնվող Ռաֆայելին իրիկնաժամին էլ տանը չգտանք, նա հերթապահում էր։ Կրտսեր զավակը՝ Արսենը, զոհվել է 1999 թվականի մայիսին, ծառայում էր առանձին սակրավորական գումարտակում։ Դպրոցական էր, երբ զենք ստանալով կամավորագրվեց առաջին վաշտին, հետո տեղափոխվեց հետախույզների մոտ, ապա ծառայությունը շարունակեց 5-րդ պաշտպանական շրջանում։ Որոշ ժամանակ անց կրկին ծառայության է անցել սակրավորական գումարտակում՝ մինչև իր մահկանացուն կնքելը։ 92 թվականին շրջափակման մեջ է եղել 9 օր շարունակ, վիրավորվել է, իր դպրոցական վերջին զանգին եկել էր հենակներով... Ստեփանակերտի հ.10 դպրոցում էր սովորում Արսենը, նրանք դասարանի ողջ տղաներով գնացել ու կամավորագրվել են Ասկոլկայի /Աշոտ Ղուլյան/ վաշտին։ Դասարանի տղաներից զոհվել են նաև Հայկն ու Արսենը։
Հակոբը բանակից զորացրվել է մայորի զինվորական կոչումով, Ռաֆայելն այսօր էլ ծառայության մեջ է կապիտանի կոչումով, հետախույզ Արսենը՝ ավագ լեյտենանտ էր...
«Մարտական խաչ»-ի ասպետ Հակոբն այն կարծիքին է, որ տղամարդն անպայման պիտի թրծվի բանակային քուրայում, դա այն միջավայրն է, որտեղ տղան տղամարդ է դառնում, իսկ Արցախի պարագայում նաև նվիրյալ պիտի լինի։ Նրա կարծիքով՝ այս պահին անհրաժեշտ է համախմբող ուժ, որ կրկին վերադարձնենք երանելի ժամանակները։ Նա մեծ հույսեր է կապում նոր, երիտասարդ սերնդի հետ՝ համոզված, որ նրանք ավելի կրթված ու հեռատես են և կարող են ժամանակին, իրադարձություններին համահունչ իրենց խոսքն ասել։Մայրը՝ տիկին Զոյան, թվարկում է որդիների ստացած պարգևներն ու պատվոգրերը... Օրերս էլ ընտանիքը ԱՀ «Մայրություն» ՀԿ նախագահության որոշմամբ արժանացավ «Լավագույն սպայական ընտանիք» հուշամեդալին։ Այն Կիսիբեկյաններին հանձնեց վարչության անդամ Էլմիրա Հայրապետյանը՝ Արցախի մայրերի սերն ու երախտագիտությունը փոխանցելով նվիրյալների տոհմի մեծ ու փոքրին։ Ընտանիքի Մեծ Մայրը հպարտ է իր երեք սպա զավակներով, մոր սիրտն, ինչ խոսք, կսկծում է, որ Արսենն այսօր շարքում չէ, սակայն նրա համար մեծ մխիթարություն է, որ որդին զգալի ներդրում է ունեցել բանակի կայացման ու հաղթանակների ձեռքբերման գործում... Ուրախ է, որ ամուսնուն թև-թիկունք դարձած պատվով որդիներ են դաստիարակել՝ Հայրենիքին պիտանի, քաջ մարտիկներ պարգևել։ 1992-1998թթ. ինքն էլ ուժերի ներածին չափով ծառայել է պաշտպանության բանակի ինժեներասակրավորական գումարտակում, իր հիմնական ծառայությունից զատ, ինչով և ինչպես կարողացել, սատար է կանգնել կռվող տղաներին։ Նա ծառայել է մոր ու քրոջ հետ միասին, նրանք Արցախյան պատերազմին դիմակայել են ընտանիքով, ու հիմա էլ ձեռքները ծալած չեն նստում ու ամեն օր ու ժամ փնտրում են ստեղծված ոչ դյուրին իրավիճակից ելքի իրենց տարբերակները։ Սպայական գերդաստանի տիկնանց համար հեշտ չէր ընտանիքի հոգսը մենակ կրելը, ամուսինների թիկունքը ամուր պահելն ու երեխաներին դաստիարակելը, երբ տան տղամարդիկ օրերով տան երես չէին տեսնում, դա լավագույն դեպքում, էլ չենք խոսում այն մասին, երբ թեժ մարտական գործողություններ էին ընթանում և նրանց սիրտը վախ ու տագնապի մեջ է։ Քիչ է ասել՝ տիկին Զոյան, հարսները՝ Գոհարն ու Լիանան, արժանապատվությամբ կրեցին իրենց բեռը, ու այսօր էլ շարունակվում է նրանց դիմանալ-դիմակայելու անխոտոր ընթացքը...Ընտանիքը գիտի ինչի համար են իր չարչարանքները, և լուռ ու հնազանդ տանում է Երկրի Մեծ Բնակիչ լինելու՝ ճակատագրով իրեն վերապահված Խաչը։
Սիրվարդ ՄԱՐԳԱՐՅԱՆ