ՀՅՈՒՍԻՍԱՅԻՆ ԱՐՑԱԽ (1988-1992)
ԲԱՔՎԻ ՔԱՂԱՔԱԿԱՆ ՊԱՐՏՈՒԹՅՈՒՆԸ
Ադրբեջանական գերությունից վերադարձել է Շահումյանի կուսշրջկոմի առաջին քարտուղարը։ Օրվա հերոսը նա է՝ Վոլոդյա Աղաջանյանը։
Գյուլիստանում տոնախմբություն է։ Վոլոդյան մտնում է Սուրբ Ամենափրկիչ եկեղեցի, մոմ է վառում։ Ժողովուրդը հետևում է նրան։
Քրիստոնեականն ու հեթանոսականը միախառնվել են իրար։ Ժողովուրդը հավաքվել է…մատաղի, զոհաբերության։
Սեղանի շուրջ զնգում են բաժակները, կենացներ են հնչում։ Ժողովուրդը ցնծում է։ Աղաջանյանին ժողովրդի սերը թևեր է տալիս։
1990 թվական։ Օգոստոսի 28։ Շահումյան։ Կուսշրջկոմի առաջին քարտուղար Վոլոդյա Աղաջանյանի աշխատասենյակը։
Առաջինը խոսեց Ադրբեջանի նախարարների խորհրդի նախագահի տեղակալը՝ Ռադաևը.
-Ձեր, այսինքն՝ հայերի կատարած սխալների հետևանքով Ադրբեջանի կոմկուսի կենտկոմի բյուրոն և նախարարների խորհուրդը որոշել են Շահումյանի շրջանում ձևավորել շրջանային կազմկոմիտե (կազմբյուրո)։ Այսինքն՝ կասեցվում է կուսշրջկոմի գործունեությունը, որի իրավասություններն անցնում են այս նոր ստեղծված մարմնին Կազմբյուրոյին։
Աղաջանյանը համբերատար լսում է։
-Դուք, որպես կուսշրջկոմի քարտուղար, ազատված եք աշխատանքից։ Կուսշրջկոմի ապարատի աշխատողներն անցնում են կազմբյուրոյի իրավասության տակ։ -Ապա Ռադաևը ներկայացնում է կազմբյուրոյի ցուցակը.
-Նախագահը կլինեմ ես։ -Կարդում է աշխատասենյակում ներկա գտնվող և Բաքվից ժամանած 8-9 հոգու անուն-ազգանուններ՝ ազգությամբ ռուս և ադրբեջանցի։ Կազմբյուրոյում ընդգրկված էին նաև կուսշրջկոմի 3-րդ քարտուղարը՝ Դանիելյան Էլմիրան և շրջգործկոմի նախագահի առաջին տեղակալը՝ Ծատրյան Արժանը։
-Որոշումն ընդունված է ոչ ճիշտ։ -Ռադաևի երկարաշունչ տեղեկատվությանն ի պատասխան հնչեց Աղաջանյանի ձայնը։
-Վերադասն ընդունել է որոշում և դուք պարտավոր եք ենթարկվել։
-Տվեք որոշումը։ -Ռադաևը սկզբում չէր ուզում տալ, և Աղաջանյանը կարծում էր, թե իր վրա հոգեբանական ճնշում են գործադրում։ Բայց երկար վիճաբանությունից հետո Ռադաևը սեղանին է դնում Ադրբեջանի կոմկուսի կենտկոմի բյուրոյի որոշումը։ Աղաջանյանը ոչ միայն պաշտոնից էր ազատված, այլև վտարված էր կոմունիստական կուսակցության շարքերից ազգայնականության և անջատողականության համար։
Այսպես կոչված` կազմբյուրոյի անդամները լուռ սպասում են, որ Աղաջանյանը թողնի աշխատասենյակը և իրենք անցնեն իրենց պարտականություններին։
Աղաջանյանը, առանց մի բառ ասելու, դուրս եկավ։
Չանցած մեկ ժամ` հրապարակում ասեղ գցելու տեղ չկար։ Ժողովուրդը պահանջում է, որ Բաքվից եկածները շենքից դուրս գան և հանդիպեն ժողովրդի հետ։
Ռադաևը ելույթ է ունենում, որի իմաստը հետևյալն է՝ ձեր կյանքը կլավացնենք, կապրեք բարեկեցիկ ու խաղաղ։ Մի քանի վայրկյան անց կազմբյուրոյի նախագահը կանգնած էր …քաշքշված շորերով։ Պահակախումբը օդում կրակում է, ժողովրդի վրա արցունքաբեր գազ է կիրառում։ Ամբոխը մոլեգնում է.
-Եթե Բաքվից եկածները չհեռանան, շենքը պայթեցնելու ենք։ Կես ժամ ժամանակ ենք տալիս։
Շրջանի զինվորական պարետը ժողովրդին խնդրում է 10 մետր հեռանալ շենքից, իսկ ինքը մտնում է Աղաջանյանի աշխատասենյակը, պահանջում, որ վերջինս ստորագրություն տա, թե քանի որ ինքը ազատված է աշխատանքից, հետևաբար, չպիտի միջամտի շրջանի քաղաքական ու տնտեսական կյանքին։
-Հակառակվելու դեպքում կկալանվեք։ -Աղաջանյանը հասկացավ, որ պարետը արդեն ենթարկվում է կազմբյուրոյին։ Չի ստորագրում գրությունը, որը նախապես պատրաստված էր։
Եվ այսպես, արտակարգ դրության շրջանի զինվորական պարետի միջնորդությամբ ժողովուրդը փոքր-ինչ խաղաղվում է, կազմբյուրոյի անդամները 20-25 օր մնում են շենքում, փորձում են հեռախոսով կապվել շրջանի ղեկավարությունից դժգոհ և տատանվող խավի հետ, բայց ոչինչ չի ստացվում, ու հեռանում են։
Սա Բաքվի և Կենտրոնի քաղաքական պարտությունն էր։ Այնուամենայնիվ, շրջանի քաղաքական և ռազմական իշխանությունները նստաշրջան հրավիրեցին, շրջանը հայտարարվեց ինքնավար տարածք ԽՍՀՄ կազմում.
Ժողովրդական պատգամավորների Շահումյանի շրջանային խորհուրդ
ՈՐՈՇՈՒՄ
27 օգոստոս, 1990թ.
XX գումարման XVIII արտահերթ նստաշրջան
Ադրբեջանական ԽՍՀ Շահումյանի շրջանը (գյուղական) ԽՍՀՄ կազմում Շահումյանի ազգային ինքնավար շրջան հռչակելու մասին
Ժողովրդական պատգամավորների շրջանային խորհուրդը նշում է, որ, հակառակ հանրապետության ղեկավարության՝ իրադրությունը կայունացնելու ձգտման մասին հայտարարություններին, իրականում շրջանի խորհրդային և կուսակցական մարմինների վրա ճնշում գործադրելու քաղաքականություն է իրականացվում։ Մեկ տարի է` Շահումյանի շրջանը տնտեսական լիակատար շրջափակման մեջ է։ Շրջան չեն հասնում սննդամթերք, շինանյութ, հեղուկ գազ, լայն սպառման ապրանք։ Հայտարարվել է ֆինանսական շրջափակում։ Ոչ մի ձեռնարկություն և հաստատություն չի ֆինանսավորվում հանրապետական բանկի կողմից։ Միաժամանակ զանգվածային լրատվամիջոցներում չի դադարում շրջանային ղեկավարության և շրջանի հայազգի բնակչության հասցեին հնչող մշտական սպառնալիքը։ Հանրային հեռուստատեսության, ռադիոյի և մամուլի կողմից Շահումյանի շրջանը ներկայացվում է որպես ծայրահեղականության և զինված ավազակության տեղամաս, այն դեպքում, երբ գյուղի խաղաղ հայ բնակիչների նկատմամբ զինված հարձակում իրականացվել և իրականացվում է ադրբեջանական կողմից։
Ձգտելով պահպանել շրջանի տարածքում խիտ բնակեցված,
16-հազարանոց հայազգի բնակչությունը, ժողովրդական պատգամավորների շրջանային խորհուրդը 1989թ. հուլիսի 26-ին ընդունեց որոշում Լեռնային Ղարաբաղի Ինքնավար Մարզի կազմ մտնելու մասին։ Մեր որոշումը, սակայն, մերժվել է Ադրբեջանի Գերագույն խորհրդի կողմից, ինչը շրջանի ճակատագրի և մեզ սպառնացող վտանգի հետ կապված մտահոգության առիթ է տալիս։
Ժողպատգամավորների շրջանային խորհուրդը լիակատար հիմունքով հայտարարում է, որ Ադրբեջանական ԽՍՀ Գերագույն խորհրդի և Ադրբեջանի Կոմկուսի կենտկոմի գործողություններն ուղղված են ԼՂԻՄ-ի սահմաններից դուրս գտնվող Ադրբեջանում միակ հայկական շրջանի կազմալուծմանը։ Նման հայտարարության համար հիմք են հանդիսանում նաև վերջին օրերի իրադարձությունները։ Ադրբեջանի Կոմկուսի կենտկոմի բյուրոյի որոշմամբ շրջանում ստեղծվել է կազմկոմիտե, որտեղ հայերն աննշան թվակազմով են ներկայացված, մասնավորապես՝ 25 տոկոսով՝ 78% հայազգի բնակչության դեպքում։ Փաստորեն, այս որոշմամբ կասեցվել է խորհրդային և կուսակցական մարմինների գործունեությունը։
Ելնելով վերը շարադրվածից և կանխատեսելով հայազգի բնակչության նկատմամբ հանրապետական կառավարության կողմից ճնշման հետագա ուժգնացումը, ինչպես նաև գտնվելով շրջանի կազմալուծման ու նրա լիակատար լիկվիդացման փաստի առաջ, արտահայտելով շրջանի ողջ հայազգի բնակչության կամքն ու գիտակցելով նրա ճակատագրի համար պատասխանատվությունը, ժողպատգամավորների Շահումյանի շրջանային խորհուրդը ՈՐՈՇԵՑ՝
Ադրբեջանական ԽՍՀ Շահումյանի շրջանը /գյուղական/ հռչակել Շահումյանի ազգային ինքնավար շրջան ԽՍՀՄ կազմում։
Շահումյանի ազգային ինքնավար շրջանի տարածքում որպես հիմնական օրենք ճանաչել ԽՍՀՄ սահմանադրությունը։
ԽՍՀՄ Նախարարների խորհրդին խնդրել` դիմել ԽՍՀՄ Գերագույն խորհրդին, ներկայացնելով նոր վարչական միավորի՝ ԽՍՀՄ կազմում Շահումյանի ազգային ինքնավար շրջանի ստեղծման համապատասխան ընթացակարգը։
ԽՍՀՄ Գերագույն խորհրդին խնդրել հաստատել տվյալ որոշումը։
Գործկոմի առաջին
փոխնախագահ՝
Ա.ԾԱՏՈՒՐՅԱՆ
Գործկոմի քարտուղար՝
Վ. ՀԱԿՈԲՅԱՆ
Նվարդ ՍՈՂՈՄՈՆՅԱՆ