ԵՐՋԱՆԿՈՒԹՅՈՒՆԸ ՀՆԱՐԱՎՈՐ Է ՓՈՂՈՎ ԳՆԵԼ
Շուտով Ամանորի և Սուրբծննդյան տոներ են։ Անկախ ամեն ինչից, մարդիկ իրար բարեմաղթանքներ են հղում, և գլխավորը երջանկությունն է։ Երջանկությունը, ըստ վիքիբառարանի, զգացմունքային վիճակ է, որը բնորոշվում է դրական կամ հաճելի հույզերով, որոնք էլ իրենց հերթին առաջացնում են բավարարվածության ուրախ վիճակ։
Մարդը մանուկ հասակից է երջանկություն փնտրում։ Նրանք երջանիկ են, եթե կուշտ են, ունեն խաղալիք, անհոգ են, վայելում են ծնողների փայփայանքը։ Երջանկության այս տարրական պայմանները երեխայի հետ մեծանում և փոխվում են. նորանոր պահանջներ են առաջ գալիս, որոնց չբավարարվածության դեպքում նրանք իրենց դժբախտ են զգում։ Եթե դիմենք Աստվածաշնչին, ապա այնտեղ երջանկության այլ սանդղակ կա, որին հասնելու համար Աստվածորդին պայմաններ է տալիս։ Նրա կողմից բնորոշված երջանկությունը երևում է երանիների մեջ. «Երանի՜ հոգով աղքատներին, որովհետեւ նրանցն է երկնքի արքայութիւնը։ Երանի՜ սգաւորներին, որովհետեւ նրանք պիտի մխիթարուեն։ Երանի՜ հեզերին, որովհետեւ նրանք երկիրը պիտի ժառանգեն։ Երանի՜ նրանց, որ քաղցն ու ծարաւն ունեն արդարութեան, որովհետեւ նրանք պիտի յագենան։ Երանի՜ ողորմածներին, որովհետեւ նրանք ողորմութիւն պիտի գտնեն։ Երանի՜ նրանց, որ սրտով մաքուր են, որովհետեւ նրանք Աստծուն պիտի տեսնեն։ Երանի՜ խաղաղարարներին, որովհետեւ նրանք Աստծու որդիներ պիտի կոչուեն։ Երանի՜ նրանց, որ հալածւում են արդարութեան համար, որովհետեւ նրանցն է երկնքի արքայութիւնը։ Երանի՜ է ձեզ, երբ ձեզ նախատեն ու հալածեն եւ իմ պատճառով ձեր մասին ամէն տեսակ չար խօսք՝ սուտ ասեն։ Ցնծացէ՜ք եւ ուրախացէ՜ք, որովհետեւ երկնքում ձեր վարձը շատ է, քանի որ այսպէս հալածեցին մարգարէներին, որոնք ձեզնից առաջ են եղել» /Մատթ.5 3-12/։ Եվ դրանք բացարձակ տարբերվում են երջանկության մասին մեր պատկերացումներից։ Մեզնից ո՞վ կարող է ասել, որ սգավորը, հոգով աղքատը, հալածվողը կարող է երջանիկ լինել։ Աստված կարծես թե երջանիկ է անվանում նրանց, ովքեր այս աշխարհի փառաց գահից ցած են գտնվում, մերժված են, հալածված՝ արդարության համար։
Աշխարհում գովազդվող երջանկությունը հաճախ հակասում է սուրբգրային երջանկությանը։ Բազմաթիվ գրքեր ու տեսահոլովակներ են պտտվում աշխարհում, թե ինչպես հասնել երջանկության։ Եթե ի մի բերենք դրանցում մատուցվող «դեղատոմսեր»-ը, ապա կհասկանանք, որ ինքնահավանությունը, հպարտությունը, մարդկանց ստելը, մոլորեցնելը, գայթակղելը, չարը բարիով փաթեթավորելը, անտարբերությունն ուրիշի կարիքի հանդեպ, այլոց երջանկության, առողջության կամ նույնիսկ կյանքի գնով սեփական բարեկեցությունն ապահովելը երջանկության հասնելու արագ ու կարճ ուղիներ են։ Եթե այս տրամաբանությանը հավատանք, ապա բոլոր հանցագործները, գողերն ու ավազակները, աշխարհի մեծահարուստներն ու կախարդները, մեծ փառքերի հասած շոու բիզնեսի ներկայացուցիչներն ու այլ նշանավոր մարդիկ պետք է որ երջանիկ լինեին։ Մինչդեռ այս մարդիկ հանդիպում են թշնամիների, սուտ բարեկամների, տարբեր որոգայթների։ Մի փոքր ցնցումից այս մարդիկ դողում են, միլիարդատերերից ոմանք մեկ միլիոն կորցնելով կամ խենթանում, կամ ինքնասպան են լինում, կատվի կամ շան սատկելը դեպրեսիայի կամ այլ հոգեկան ախտերի առաջացման պատճառ է դառնում, տոն օրերին շքեղ նվեր չստանալը սիրելիներից՝ բաժանվելու առիթ է հանդիսանում, աճուրդներին փափագելի իրին չհասնելու «ծանր փորձությունը» կարող է ոմանց հոգեկանը խաթարել։ Սա՞ է երջանկությունը, որին փափագում են անտեղյակները։ Ինչպես ասել է Լառոշֆուկոն. «Քանի որ այս աշխարհում երջանիկ են քչով բավարարվող մարդիկ, ապա ինչքան դժբախտ են հարուստները, որոնց երջանիկ լինելու համար շատ բան է պետք»։
Ով անձնական բարեկեցություն է փնտրում, այն էլ ուրիշների հաշվին, երբեք երանելի չի լինի։ Իրական երջանկությունը հանրօգուտ է, ազգային, միասնական։ Այսօր, երբ բազում մարտահրավերների առաջ ենք կանգնած, երբ մեզ սպառնում են պատերազմով, գերությամբ, սովով, շրջափակմամբ, շատ ավելի հստակ ենք ընկալում և գալիս ճշմարիտ արժեքները գնահատելու, յուրացնելու, կիրառելու նուրբ արվեստին։ Երբ այլևս չես ուրախանում տանդ եղած սննդով՝ իմանալով, որ շատերը չունեն, երբ տաքանալիս հիշում ես, որ ընկերդ սառը բնակարանում է նստած իր երեխաներով, երբ հաց կամ կարտոֆիլ ես գտնում վաճառքում՝ իմանալով, որ գործընկերդ վերջին երեք կարտոֆիլը երեկ է եփել, երբ շքեղ տոնածառ էիր գնել ու որոշել, որ շատ տարիներ այն կզարդարի բնակարանդ, այսօր այլևս այն չի ուրախացնում սիրտդ՝ իմանալով, որ շատ-շատերն անգամ չեն կարողանում տեսնել իրենց հարազատներին... գալիս է քո սեփականով կիսվելու իմաստուն որոշումը։ Ու երբ վճռում ու իրագործում ես այն, հասնում ես Քրիստոսի քարոզած ճշմարիտ երանության զգացողությանը, որն այլևս ոչ մեկ չի կարող խլել քեզնից։ Անգամ սովը, հիվանդությունը, անհարմարավետությունը չեն կարող մարդուն դժբախտացնել, երբ նա սովորել է կիսվել բարիքով, սիրել ու գնահատել այլոց։
Ճշմարիտ երջանկությունը գտնելու համար ունենք բարենպաստ պայմաններ ու համապատասխան ժամանակներ։ Սա է հոգևոր բերք հավաքելու ժամանակը։ Չարչարանքներից ազատվելուց հետո, երբ սկսվի բնականոն կյանքը, հոգևոր բերք հավաքած մարդիկ կապրեն իրական ու ճշմարիտ երջանկությամբ։ Եվ, վերջապես, պարզվում է՝ երջանկությունը հնարավոր է փողով գնել։ Դրա համար պետք է փող ծախսել կարիքավորներին օգնելու համար։ Աշխարհի 136 երկիր ընդգրկող Gallup International-ի հարցումը ցույց է տվել, որ երջանկության և բարեգործության միջև կապ կա։ Բարեգործական նվիրատվություններ անող մարդիկ ավելի հաճախ են իրենց երջանիկ համարում։
Սոֆի ԲԱԲԱՅԱՆ